Karim Benzema ឈ្នះពាន​រង្វាន់​កីឡាករ​ឆ្នើម​ប្រចាំ​ឆ្នាំ​របស់ UEFA

កាល​ពី​ម្សិលមិញ​នេះ នៅ​ក្នុង​ព្រឹត្តិការណ៍​នៃ​ការ​ចាប់​ឆ្នោត​វគ្គ​ចែក​ពូល UEFA Champions League ខ្សែប្រយុទ្ធ Karim Benzema របស់​ក្លឹប​អធិរាជស Real Madrid បាន​ឈ្នះពាន​រង្វាន់​កីឡាករ​ឆ្នើម​ប្រចាំ​ឆ្នាំ​របស់ UEFA (UEFA Men’s Player of the Year Award) បន្ទាប់​ពី​កីឡាករ​ឆ្នើម​រូប​នេះ លេច​ធ្លោរ​ខ្លាំង​នៅ​រដូវកាល​ឆ្នាំ 2021/22។

កីឡាករ​ឆ្នើម​សញ្ជាតិ​បារាំង Karim Benzema គឺ​ជា​តួអង្គ​ដ៏​សំខាន់​ដែល​បាន​ជួយ​ឲ្យ​ក្លឹប​ស្ដេចស Real Madrid ឈ្នះជើង​ឯក UEFA Champions League ជា​លើកទី 14 របស់​ពួកគេ ដោយ​បាន​ស៊ុតបញ្ចូលទី​បាន​យ៉ាង​ច្រើន​គ្រាប់​ និង​រក​បាន​គ្រាប់​បាល់​ក្នុង​ការ​ប្រកួត​ជម្រុះ​សំខាន់ៗ​ជាមួយ PSG, Chelsea និង Manchester City។

ដូចគ្នា​នេះ​ដែរ Karim Benzema ក៏​ដើរ​តួ​យ៉ាង​សំខាន់​ក្នុង​យុទ្ធនាការ​ឈ្នះពាន La Liga របស់ Real Madrid ផង​ដែរ។ សមិទ្ធិផល​ទាំង​ឡាយ​ដែល Benzema បាន​ធ្វើ​កាល​ពី​រដូវកាល​មុន ជា​ហេតុផល​ដ៏សាកសម​បំផុត​ក្នុង​ការ​ឈ្នះពាន​នេះ ហើយ​គាត់​ថែម​ទាំង​ជា​បេក្ខភាព​ដ៏​សំខាន់​ដែល​នឹង​ឈ្នះពាន Ballon d’or នៅ​ឆ្នាំ​នេះ​ដែរ។

យ៉ាង​ណា​មិញ​គ្រូ​បង្វឹក​របស់ Karim Benzema គឺ​លោក Carlo Ancelotti ក៏​បាន​ឈ្នះ​ពាន​រង្វាន់​ជា​គ្រូបង្វឹក​ឆ្នើម​ប្រចាំ​ឆ្នាំ​របស់ UEFA ផង​ដែរ បន្ទាប់​ពី​បាន​ដឹកនាំ Real Madrid ឲ្យ​ឈ្នះពាន La Liga និង UEFA Champions League កាល​ពី​រដូវកាល​មុន។

ប្រភព: 90 Min