Antony ផ្ទេរ​មក​បិសាចក្រហម ក្នុង​នាម​ជា​កីឡាករ​ដែល​មាន​តម្លៃ​ខ្លួន​ផ្ទេរ​ថ្លៃ​បំផុត ប្រចាំ​លីគ​កំពូល​ហូឡង់

នៅ​ទីបំផុត​ក្លឹប​បិសាចក្រហម Manchester United បាន​ប្រកាស​ជា​ផ្លូវការណ៍​ហើយ ដោយ​ពួក​គេ​បាន​ឈាន​ដល់​កិច្ច​ព្រមព្រៀង​មួយ ដើម្បី​ចុះ​ហត្ថលេខា​លើ​តារាឆ្នើម Antony របស់​ក្លឹប AFC Ajax កាល​ពី​ប៉ុន្មាន​ម៉ោង​មុន​នេះ។

របាយការណ៍​កន្លង​មក​បាន​រាយការណ៍​ពី​ការ​ចាប់​អារម្មណ៍​របស់​ក្លឹប​បិសាចក្រហម Manchester United លើ​ខ្សែ​ប្រយុទ្ធ​ស្លាប​សញ្ជាតិ​ប្រេស៊ីល​រូបនេះ កើត​ឡើង​តាំង​ពី​ខែកុម្ភៈ​​មកម្ល៉េះ ហើយ​គ្រប់​យ៉ាង​កាន់​តែ​ច្បាស់លាស់​ថែម​ទៀត ពេល​ដែល​លោក Erik ten Hag ក្លាយ​ជា​គ្រូ​បង្វឹក​ថ្មី​របស់​ក្លឹប។

Ajax បាន​រក្សា​តម្លៃ​ផ្ទេរ​ដ៏​ធំ​សម្បើម​មួយ​ទៅ​លើ Antony ហើយ​ពួក​គេ​រង​ចាំ​រហូត​ដល់​ក្លឹប​បិសាចក្រហម​ហ៊ាន​ឡើង​ថ្លៃ​​ដល់ 100 លានអឺរ៉ូ ដែល​ជា​តម្លៃ​ផ្ទេរ​ខ្ពស់​បំផុត​ដំបូង​គេ​ ក្នុង​ចំណោម​កីឡាករ​ទាំង​អស់​ដែល​ផ្ទេរ​ចេញ​ពី​លីគ​កំពូល​ហូឡង់ Eredivisie។

ដោយ​ឡែក Manchester United បាន​ដាក់​សំណើរ​ដេញ​ថ្លៃ 90 លានអឺរ៉ូ​សម្រាប់ Antony កាល​ពី​ថ្ងៃសុក្រ​កន្លង​ទៅ ហើយ​ក្លឹប Ajax បាន​បដិសេធ​លើ​ដំណើរ​នេះ។ បន្ត​មក Antony បាន​សុំ​ឲ្យ​ក្លឹបលក់​គាត់​ចេញ ព្រោះ​គាត់​ចង់​ផ្ទេរ​មក​លេង​នៅ​អង់គ្លេស និង​ចូលរួម​ជា​មួយ​អតីត​គ្រូ​បង្វឹក​របស់​ខ្លួន Erik ten Hag នៅ Old Trafford។ ជា​ចុងក្រោយ ក្លឹប​ទាំង​ពីរ​បាន​សម្រេច​លើ​តម្លៃ​ផ្ទេរ 100 លានអឺរ៉ូ​។

ដូច​គ្នា​នេះ​ដែរ Antony នឹង​ក្លាយ​ជាកីឡាករ​ទីប្រាំ​ហើយ​របស់​ក្លឹប​បិសាចក្រហម នៅ​រដូវ​ក្តៅ​នេះ បន្ទាប់ពី​ការ​ផ្ទេរ Tyrell Malacia, Christian Eriksen, Lisandro Martinez និង Casemiro។

ប្រភព: 90 Min