Alvarez ប្រាប់​ក្លឹប​របស់​ខ្លួន​ថា ចង់ចាក​ចេញ​បន្ទាប់​ពី​ទទួល​បាន​ការ​ដេញ​ថ្លៃ​ពី Chelsea

ក្លឹប​តោខៀវ Chelsea បាន​បើក​ការ​ដេញ​ថ្លៃ​លើ​ទីផ្សារដោះដូរ​កីឡាករសម្រាប់​ខ្សែបម្រើ Edson Alvarez របស់​ក្លឹប Ajax ខណៈ​ដែល​កីឡាករ​សញ្ជាតិ​ម៉ិកស៊ិក​រូបនេះ​ត្រូវ​បាន​គេ​ប្រាប់​ឲ្យ​ដឹង​ថា ចង់​ចាកចេញ​ទៅ​ចូលរួម​ជាមួយ​ក្លឹប​តោខៀវ។

Alvarez គឺ​ជា​កីឡាករ​ដែល​ស្ថិត​ក្នុង​គោលដៅ​នៃ​ការចង់​បាន​ពី​ក្លឹប​ធំៗ​មួយ​ចំនួន​នៅ​រដូវក្តៅ​នេះរួមទាំង Newcastle ផង​ដែរ។ លើស​ពី​នេះ​ទៅ​ទៀត Newcastle បាន​និយាយ​ជា​មួយ​ក្លឹប Ajax ម្ដង​ហើយ​កាល​ពី​ដើម​ខែ​នេះ ប៉ុន្តែការ​ស្នើ​​តម្លៃ​ផ្ទេរ 40 លាន​អឺរ៉ូ​របស់​ពួក​គេ ​ត្រូវ​បាន​ច្រាន​ចោល។

កីឡាករ​សញ្ជាតិ​ម៉ិកស៊ិក​វ័យ 24 ឆ្នាំ​រូបនេះ​បាន​ទទួល​យក​ការ​សម្រេច​ចិត្ត​របស់​ក្លឹប Ajax ដែល​បដិសេធ​ការ​ប៉ុនប៉ង​ផ្ទេរ​របស់ Newcastle ប៉ុន្តែ​ការ​ដេញ​ថ្លៃ​ពី Chelsea គឺ​ជា​រឿង​ផ្សេង។ បន្ទាប់​ពី​ក្រុម​តោខៀវ Chelsea បាន​ដាក់​សំណើរ 50 លានអឺរ៉ូ នៅ​លើ​តុ Edson Alvarez ក៏​បង្ហាញ​ប្រាប់​ក្លឹប​របស់​ខ្លួន​ថា គាត់​ចង់​ចាកចេញ ដែល​ជា​សញ្ញា​មួយ​ឲ្យដឹង​ថា គាត់​ចង់​ឲ្យ Ajax លក់​គាត់​ទៅ​ឲ្យ​ក្លឹប​តោខៀវ Chelsea។

ប្រភព​ច្បាស់លាស់​មួយ​បាន​លើកឡើង​ថា Alvarez កំពុង​គិត​ថា នេះ​គឺ​ឱកាស​ដ៏​ល្អ​មួយ ខណៈដែល​មិត្ត​រួម​ក្រុម​របស់​ខ្លួន Antony ទើប​តែ​បាន​ផ្ទេរ​ទៅ Manchester United ដើម្បី​សាកល្បង​រសជាតិ​ថ្មី​នៅ Premier League ដែល​ជា​លីគកំពូល​ធ្វើ​ឲ្យ​កីឡាករ​ងាយ​លេចធ្លោរ។ ហេតុ​ដូច្នេះ​ហើយ ពេល​នេះ​គាត់​បាន​ត្រៀម​ខ្លួន​រួចជាស្រេច ដើម្បី​ចូលរួម​ជាមួយ Chelsea ផង​ដែរ។

ទោះ​យ៉ាង​ណា​ក៏ដោយ នៅ​សល់​តែ​ពេល​វេលា​ជាង 24 ម៉ោង​ទៀត​ប៉ុណ្ណោះ​នៃ​ទីផ្សារ​ដោះដូរ​កីឡាករ ដូច្នេះ​កិច្ចព្រមព្រៀង​រវាង​ក្លឹប​ទាំង​ពីរ​ត្រូវ​តែ​ធ្វើ​ឲ្យ​បាន​ឆាប់​រហ័ស​បំផុត។ Alvarez កំពុង​បញ្ជាក់​យ៉ាង​ច្បាស់​ទៅ​កាន់ Ajax ថា គាត់​ចង់​ឲ្យ​ក្លឹប​ទទួល​យក​សំណើរ​ផ្ទេរ 50 លានអឺរ៉ូ​នេះ។

ប្រភព: 90 Min