នៅ​មិន​ទាន់​ស្ងប់​ចិត្ត​ឡើយ កឹ្លប​តោខៀវ Chelsea នឹង​ព្យាយាម​ចុះ​ហត្ថលេខា​លើ​ខ្សែ​ប្រយុទ្ធ​ម្នាក់​ទៀត​ពី​ក្លឹប AC Milan

ទីផ្សារ​ដោះដូរ​កីឡាករ​រដូវក្តៅ​នេះ បាន​ឈាន​ដល់​ថ្ងៃផុត​កំណត់​នៅ​ថ្ងៃទី 1 ខែកញ្ញា នេះ​ហើយ ប៉ុន្តែ​ពាក្យ​ចចាម​អារ៉ាម​ជា​ច្រើន​នៅ​តែ​បន្ត ខណៈ​ដែល​ទ្វារ​នៃ​ការ​ផ្ទេរ​កីឡាករ​នឹង​បើក​ជា​ថ្មី​ម្ដង​ទៀត​នៅ​ខែ​មករា​ឆ្នាំ​ក្រោយ។

ជាមួយ​គ្នា​នេះ​ដែរ ក្លឹប​តោខៀវ Chelsea ត្រូវ​បាន​គេ​រាយការណ៍​ថា បាន​ដាក់​សំណើរ​ដេញ​ថ្លៃ​ចំនួន​ទឹកប្រាក់ 80 លានអឺរ៉ូ ដើម្បី​ផ្ទេរ​ខ្សែប្រយុទ្ធ Rafael Leao របស់ AC Milan នៅ​ថ្ងៃ​ចុងក្រោយ​នៃ​ការ​ដោះដូរ​កីឡាករ​នេះ ប៉ុន្តែ​ត្រូវ​បាន​ក្លឹប AC Milan បដិសេធ ដោយ​ទាមទារ​រហូត​ដល់ 150 លានអឺរ៉ូ។

ក្លឹប​តោខៀវ Chelsea មិន​អាច​នាំ​យក Rafael Leao នៅ​រដូវក្ដៅ​នេះ​ឡើយ ព្រោះ​ការ​ដាក់​សំណើរ​ដេញ​ថ្លៃ​របស់​ពួក​គេ​ហាក់​ដូច​ជា​យឺត​ពេល​ខ្លាំង​ពេក។ យ៉ាង​ណា​ក្លឹប​តោខៀវ Chelsea ត្រូវ​បាន​គេរំពឹង​ថា នឹង​បន្ត​ការ​ចាប់អារម្មណ៍ Rafael Leao បន្ត​ទៀត និង​រងចាំ​ឱកាស​មក​ដល់​នៅ​ខែ​មករា​ឆ្នាំ 2023។

ជាមួយ​គ្នា​នេះ​ដែរ​ក្លឹប​យក្ស​បារាំង Paris Saint-Germain និង Real Madrid ក៏​ធ្លាប់​បាន​ចាប់​អារម្មណ៍​ខ្លាំង​ទៅលើ Rafael Leao ដែរ​កាល​ពី​ដើម​ឆ្នាំ​នេះ ប៉ុន្តែ​ក្លឹប​ទាំងពីរ​បាន​អស់​ចិត្ត​ភ្លាមៗ នៅពេល​ដែល​ដឹង​ពី​តម្លៃផ្ទេរ​ដ៏​ខ្ពស់​ដែល AC Milan ចង់​បាន។

ខ្សែ​ប្រយុទ្ធ​វ័យ 23 សញ្ជាតិ​ព័រទុយហ្គាល់​រូប​នេះ នៅ​មាន​កុងត្រា​រយៈពេល​ពីរ​ឆ្នាំ​ទៀត ជា​មួយ​ក្លឹប​ម្ចាស់​ជើង​ពាន​នៅ​អ៊ីតាលី AC Milan ប៉ុន្តែ​ក្លឹប​បច្ចុប្បន្ន​របស់​គាត់​កំពុង​ចង់​បន្ត​កុងត្រា​ថ្មី​ជា​ច្រើន​ឆ្នាំ​បន្ថែម​ទៀត​ដោយ​តម្លើង​ប្រាក់​ខែ និង​ធ្វើ​ឲ្យ​ខ្សែប្រយុទ្ធ​នេះ​មាន​តម្លៃ​កាន់​តែ​ថ្លៃ​នៅ​ពេល​ផ្ទេរ​ចេញ។

ប្រភព: 90 Min