Antonio Conte លើក​ឡើង​ថា សមត្ថភាព​របស់ Richarlison សក្ដិសម​ជា​កីឡាករ​ដែល​លេង​នៅ UCL

គ្រូ​បង្វឹក​របស់​ក្លឹប​មាន់​ខ្នាយមាស Tottenham Hotspur លោក Antonio Conte បាន​សរសើរ​កូន​ក្រុម​របស់​ខ្លួន Richarlison ដែល​ទើប​តែ​បាន​ឈាន​ជើង​ជា​លើក​ដំបូង​ក្នុង​ក្តីស្រមៃ​របស់​ខ្លួន សម្រាប់​ការ​បង្ហាញ​សមត្ថភាព​ក្នុង​ការ​ប្រកួត​ក្របខ័ណ្ឌ UEFA Champions League។

ខ្សែប្រយុទ្ធ​សញ្ជាតិ​ប្រេស៊ីល Richarlison បាន​ស៊ុតបញ្ចូលទី​ពីរ​គ្រាប់ ដែល​បាន​ជួយ​ឲ្យ​ក្លឹប Tottenham Hotspur ទទួល​បាន​ជ័យជម្នះ 2-0 ទៅ​លើ​ក្រុម​ខ្លាំង​មក​ពី​លីគ​កំពូល​នៃ​ប្រទេស​បារាំង Marseille កាល​ពី​ថ្ងៃពុធ​សប្ដាហ៍​នេះ។

យ៉ាង​ណា​មិញ Richarlison ធ្លាប់​បាន​និយាយ​អំពី​ការ​ចូលរួម​ជាមួយ Tottenham Hotspur ផង​ដែរ​ថា ដើម្បី​បំពេញ​ក្តី​សុបិន​របស់​គាត់​ក្នុង​ការ​លេង​នៅ UEFA Champions League ហើយ​ពេល​នេះ​លោក Antonio Conte ជឿជាក់​ថា គាត់​សម​នឹង​ទទួល​បាន​ឱកាស​បែប​នេះ។

Antonio Conte បាន​និយាយ​ថា៖ “ខ្ញុំ​ចងចាំ​បាន​យ៉ាង​ច្បាស់ នៅ​ពេល​យើង​ចុះ​ហត្ថលេខា​លើ​គាត់ គាត់​បាន​និយាយ​ថា គាត់​មិន​អាច​ទប់​ចិត្ត​ក្នុង​ការ​លេង និង​ស្តាប់​ចម្រៀង​របស់ UEFA Champions League បាន​ទេ។ ពាក្យ​នេះ​ខ្លី ប៉ុន្តែ​ពិត​ជា​មាន​ន័យ​សំខាន់​សម្រាប់​ខ្ញុំ”។

លោក​បាន​បន្ថែម​ទៀត​ថា៖ “Richarlison ជា​ខ្សែប្រយុទ្ធ​ដែល​អាច​លេង​​តំណែងរបស់ Kulusevski បាន ប៉ុន្តែ​នៅ​ពេល​ឲ្យ​គេ​លេង​ជា​មួយ​គ្នា​នោះ គាត់​អាច​លេង​ក្នុង​តួនាទី​របស់ Son Heung-min រឺ​អាច​លេង​ក្នុង​តំណែង​របស់ Harry Kane…”។

ប្រភព: 90 Min