Antony និយាយ​ថា៖ គាត់​បាន​រៀន​សូត្រ​ច្រើន​ពី Cristiano Ronaldo ដែល​ជា​កីឡាករ​ល្អ​បំផុត​លើ​ពិភពលោក

កីឡាករ​ឆ្នើម​ចំណូល​ថ្មី​របស់​ក្លឹប​បិសាចក្រហម Manchester United គឺ​ខ្សែ​ប្រយុទ្ធ​ស្លាប​សញ្ជាតិ​ប្រេស៊ីល Antony បាន​បើក​ចំហរ​អំពី​ទំនាក់​ទំនង​របស់​គាត់​ជាមួយ​មិត្ត​រួម​ក្រុម Cristiano Ronaldo និង​បាន​និយាយ​ថា ខ្សែ​ប្រយុទ្ធ​សញ្ជាតិ​ព័រទុយហ្គាល់ ជាកីឡាករ​ល្អ​បំផុត​ក្នុង​លោក។

យ៉ាង​ណា​មិញ ក្លឹប​បិសាចក្រហម Manchester United បាន​បញ្ចប់​កិច្ច​ព្រមព្រៀង​ផ្ទេរ​តម្លៃ 100 លានអឺរ៉ូ ដើម្បី​ចុះ​ហត្ថលេខា​លើ Antony ពី​ក្លឹប​ហូឡង់ AFC Ajax នៅ​ចុង​បញ្ចប់​នៃ​ទីផ្សារ​ដោះដូរ​កីឡាករ​រដូវក្តៅ​នេះ ស្រប​ពេល​ដែល​ទម្រង់​លេង​របស់​ក្លឹប​បិសាចក្រហម​នៅ​មាន​ភាព​មិន​ទាន់​ល្អ​ប្រសើរ​ឡើយ​នៅ​តំបន់​ប្រយុទ្ធ​ខាង​លើ។

ខ្សែ​ប្រយុទ្ធ Cristiano Ronaldo នៅតែ​គ្រប​ដណ្ដប់​ដោយ​ភាព​មិន​ច្បាស់លាស់​អំពី​អនាគត​របស់​ខ្លួន ដោយ​គាត់​នៅ​តែ​ព្យាយាម​ចង់​ចាកចេញ ដើម្បី​ស្វែងរក​ក្លឹប​ថ្មី​ដែល​មាន​ការ​ប្រកួត​ប្រជែង​នៅ​ក្របខ័ណ្ឌ UEFA Champions League ។

ដោយ​ឡែក Antony បាន​ប្រាប់ MUTV ថា៖ “ខ្ញុំ​មក​ជួយ​មិត្ត​រួម​ក្រុម​របស់​ខ្ញុំ មិន​​ថា​គេ​អាយុ​ប៉ុន្មាន​ទេ។ កីឡាករ​ទាំង​អស់​សុទ្ធ​តែ​មាន​ទេពកោសល្យ។ ពាក្យ​មិន​អាច​ពណ៌នា​គឺ​ថា Cristiano Ronaldo ជា​កីឡាករ​ល្អ​បំផុត​ក្នុង​ពិភពលោក។ ត្រឹមតែ​ប៉ុន្មាន​ថ្ងៃ​ប៉ុណ្ណោះ ខ្ញុំ​បាន​រៀន​សូត្រ​ច្រើន​ពី​គាត់។ គាត់​មាន​គំនិត​មិន​ធម្មតា ហើយ​គ្រប់​ពេល​ដែល​ខ្ញុំ​និយាយ​ជាមួយ​គាត់ ខ្ញុំ​ទទួល​បាន​ដំបូង​ន្មាន​ជា​ច្រើន”។

គួរ​រំលឹក​ផង​ដែរ​ថា កាល​ពី Antony នៅ​ជា​កីឡាករ​របស់​ក្លឹប Ajax ហើយ​ត្រូវ​បាន​គេ​តម្រូវ​ឲ្យ​ជ្រើសរើស​មួយ​ក្នុង​ចំណោម​កីឡាករ​ពីរ​រូប​រវាង Messi និង Cristiano Ronaldo ពេល​នោះ Antony បាន​ជ្រើសរើស​យក Lionel Messi។

ប្រភព: 90 Min