Abraham លើក​ឡើង​ថា ការ​ចាកចេញ​ពី Chelsea ធ្វើ​ឲ្យ​សមត្ថភាព​របស់​ខ្លួន​រីកចម្រើន

ខ្សែ​ប្រយុទ្ធ​សញ្ជាតិ​អង់គ្លេស Tammy Abraham បាន​បង្ហើប​ថា គាត់​មិន​មាន​ការ​សោកស្តាយ​ចំពោះ​ការ​ចាកចេញ​ពី​អតីត​ក្លឹប​តោខៀវ Chelsea ទៅ Roma ឡើយ ព្រោះ​ការ​ចាកចេញ​នេះ​បាន​ធ្វើ​ឲ្យ​សមត្ថភាព​របស់​គាត់​រីកចម្រើន​ជាង​មុខ។

យ៉ាង​ណា​មិញ​ជាមួយ​នឹង​ឱកាស​ក្នុង​បង្ហាញ​ខ្លួន​ក្នុង​ជម្រើស 11 នាក់​ដំបូង​បាន​តិចតួច និង​មិន​សូវ​មាន​ឱកាស​លេង​ច្រើន​នោះ Tammy Abraham បាន​ជ្រើសរើស​ដោយ​ចាកចេញ​ពី​ក្លឹប​តោខៀវ Chelsea ដែល​ជា​ក្លឹប​ពី​កុមារភាព​ខ្លួន និង​ផ្ទេរ​ទៅ​ចូលរួម​ជា​មួយ Roma កាល​ពី​ដើម​រដូវកាល​ឆ្នាំ 2021/22។

ដោយ​ឡែក ខ្សែ​ប្រយុទ្ធ​កណ្ដាល​រូប​នេះ​បាន​ទទួល​ភាព​ជោគជ័យ​យ៉ាង​ខ្លាំង​នៅ​ក្នុង​អាជីពបាល់ទាត់​នៅ​ប្រទេស​អ៊ីតាលី​ចាប់​តាំង​ពី​ពេល​ផ្ទេរ​មក ដោយ​ស៊ុតបញ្ចូលទី​បាន 17 គ្រាប់​នៅ Serie A កាល​ពី​រដូវកាល​មុន និង​ក្លាយ​ជា​កីឡាករ​ឆ្នើម​ម្នាក់​របស់​ក្លឹប​ផង​ដែរ។

ជាមួយនឹង Tammy Abraham ដែល​កំពុង​ឡើង​ជើង​ខ្លាំង​​នោះ ក្លឹប​តោខៀវ Chelsea បាន​ជួប​បញ្ហា​ដោយ​ខ្វះ​ខ្សែ​ប្រយុទ្ធ​កណ្ដាល ហើយ​នៅ​រដូវកាល​នេះ​ពួក​គេ​ទើប​តែ​បាន​ចុះ​ហត្ថលេខា​លើ Aubameyang ពី​ក្លឹប FC Barcelona ក្នុង​តម្លៃ 12 លានអឺរ៉ូ។

ទោះ​ជា​យ៉ាង​ណា Abraham បាន​ប្រាប់​កាសែត Daily Mail ថា៖ “ប្រសិន​បើ​អ្នក​ប្រាប់​ខ្ញុំ​កាល​ពី​ពីរ​បី​ឆ្នាំ​មុន​ថា​ខ្ញុំ​នឹង​ទៅ​លេង​នៅ​អ៊ីតាលី​ថ្ងៃ​ណាមួយ នោះ​ខ្ញុំ​នឹង​មិន​ជឿ​អ្នក​ទេ ហើយ​ការ​ចាកចេញ​ពី Chelsea គឺ​ពិបាក។ វា​ជា​កន្លែង​ដែល​ខ្ញុំ​នៅ​តាំង​ពី​អាយុ​ 7 ឆ្នាំ”។

Tammy Abraham បាន​បន្ថែម​ទៀត​ថា៖ “ខ្ញុំ​មិន​យល់​ដឹង​ច្រើន​អំពី​បាល់ទាត់​នៅ​អ៊ីតាលី​នេះ​ទេ ប៉ុន្តែ​វា​បាន​ជួយ​ខ្ញុំ​ឲ្យ​អភិវឌ្ឍន៍​ខ្លួន​ក្នុង​នាម​ជា​កីឡាករ។ ខ្ញុំ​បាន​ចេញ​ពី​តំបន់​សុខស្រួល​របស់​ខ្ញុំ ហើយ​មិន​មាន​ការ​សោកស្ដាយ​អ្វី​ឡើយ។ ខ្ញុំ​ស្រឡាញ់​ការ​ជីវិត​រស់​នៅ​ទីនេះ ដែល​ផ្សេង​ពី​បាល់ទាត់”។

ប្រភព: 90 Min