Connect with us

បាល់ទាត់អន្តរជាតិ

Dumfries សារភាព​ថា គាត់​​ទទួល​បាន​ចំណាប់​អារម្មណ៍​ផ្ទេរ​ពី​ក្លឹប​តោខៀវ Chelsea និង Manchester United

Published

on

ខ្សែ​ការពារ​ស្លាប​របស់​ក្លឹប Inter Milan គឺ​កីឡាករ Denzel Dumfries បាន​សារភាព​ថា គាត់​ត្រូវ​បាន​ទទួល​ការ​ពេញ​ចិត្ត និង​ចាប់​អារម្មណ៍​យ៉ាង​ពិត​ប្រាកដ ពី​សំណាក់​ក្លឹប​ធំៗ​ពីរ​នៅ​អង់គ្លេស ដែល​មានតោខៀវ Chelsea និង Manchester United។

ទោះ​​ជា​យ៉ាង​ណា Denzel Dumfries ក៏​បាន​ប្រាប់​ដែរ​ថា គាត់​បាន​រក្សា​ជំហរ​ដោយ​ច្បាស់លាស់​បំផុត ក្នុង​ការ​សម្រេច​ចិត្ត​បន្ត​រួម​រស់​ជា​មួយ​ក្លឹប Inter Milan។ កីឡាករ​សញ្ជាតិ​ហូឡង់​រូប​នេះ ទើបតែ​បាន​ចូលរួម​ជាមួយ Inter Milan កាល​ពី​រដូវក្តៅ​ឆ្នាំ​មុន​ប៉ុណ្ណោះ ដោយ​ផ្ទេរ​ពី PSV Eindhoven ប៉ុន្តែ​គាត់​បាន​បង្ហាញ​ខ្លួន​យ៉ាង​លេចធ្លោរ​សម្រាប់​អ្នកគាំទ្រ​នៅ San Siro ដោយ​ស៊ុត​បញ្ចូលទី​បាន​រហូត​ដល់ 5 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​ចំនួន 4 ដង ក្នុង​នាម​ជា​ខ្សែការពារ​ស្ដាំ។

ភាព​លេចធ្លោរ​ដ៏​គួរ​ឲ្យ​ចាប់​អារម្មណ៍​នេះ ធ្វើ​​ឲ្យ​គាត់​ត្រូវ​បាន​ក្លឹប​តោខៀវ Chelsea និង Manchester United ចង់​បាន ខណៈ​ដែល​ក្លឹប​ទាំងពីរ​ហាក់​ដូច​ជា​កំពុង​ខ្វះខាត​ខ្សែ​ការពារ​ស្លាប រឺ​ខ្សែការពារ​ស្តាំ​ដែល​មាន​ភាព​រឹងមាំ​ដូច Dumfries។

និយាយ​ទៅ​កាន់ De Telegraaf ខ្សែការពារ Dumfries បាន​លើក​ឡើង​ពី​ការ​បដិសេធ​​ផ្ទេរ​ចេញ​ពី Inter Milan និង​បាន​បង្ហើប​ថា គាត់​នៅ​មិន​ទាន់​នឿយណាយ​ជាមួយ​នឹងបាល់ទាត់​នៅ​ក្នុង​ប្រទេស​អ៊ីតាលី​ឡើយ ហើយ​គាត់​ចង់​ឈ្នះពាន Serie A ជាមួយ​ក្លឹប​បច្ចុប្បន្ន​ជាមុន​សិន។

ប្រភព: 90 Min

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២