Ronald Araujo សម្រេច​ចិត្ត​វះកាត់​ព្យាបាល​របួស ខណៈ​ដែល​អ្នកគាំទ្រ​អ៊ុយរូហ្គាយ​បាន​រិះគន់​លើ​រឿង​នេះ

ខ្សែការពារ Ronald Araujo របស់​ក្លឹប​អ្នក​មានបុណ្យ Barcelona បាន​សម្រេច​ចិត្ត​ធ្វើ​ការ​វះកាត់​មុន​ការ​ប្រកួត World Cup ដែល​នឹង​ខិត​ជិត​មក​ដល់។ គាត់​បានជ្រើសរើស​ការ​វះកាត់​ភ្លៅ​របស់​ខ្លួន ហើយ​ក៏​ទទួល​បាន​ការ​រិះគន់​ពី​អ្នកគាំទ្រ​អ៊ុយរូហ្គាយ​ផង​ដែរ។

ខ្សែ​ការពារ​កណ្តាល​របស់​ក្លឹប FC Barcelona រូប​នេះ អាច​នឹង​ខកខាន​ការ​ប្រកួត FIFA World Cup នៅ​រដូវរងារ​ឆ្នាំ​នេះ ជាមួយ​នឹង​ការវះ​កាត់ ដែល​មាន​ន័យ​ថា Araujo នឹង​ត្រូវ​ការ​រយៈពេល​បី​ខែ​ក្នុង​ការ​សម្រាក​ព្យាបាល​ឲ្យ​ជា​ពេញលេញ​វិញ។

ការ​ចាកចេញ​ពី​ទីលាន​ដ៏យូរ​នេះ​ហើយ បាន​ធ្វើ​ឲ្យ​ប្រជាជន​អ៊ុយរូហ្គាយ​មាន​ការ​ខឹង​សម្បារ ព្រោះ​ក្រុម​ជម្រើស​ជាតិ​របស់​ពួកគេ​នឹង​គ្មាន​វត្តមាន​ខ្សែការពារ​រូប​នេះ​ឡើយ ក្នុង​ការ​ប្រកួត​បើក​ឆាកនៅ​ប្រទេស​កាតា។

យ៉ាង​ណា​មិញ​ឆ្លើយ​តប​នឹង​ការ​រិះគន់ Araujo បាន​សរសេរ​សារ​នៅ​លើ Twitter ដោយ​និយាយ​ថា៖ “ខ្ញុំ​ចង់​បញ្ជាក់​ឲ្យ​ច្បាស់​ពី​ហេតុផល​ដែល​ខ្ញុំ​បាន​សម្រេច​ចិត្ត​បែប​នេះ ដើម្បី​ជៀសវាង​ការ​សង្ស័យ។ ខ្ញុំ​ស្រឡាញ់​ប្រទេស​របស់ខ្ញុំ ហើយ​ខ្ញុំ​ស្រឡាញ់​ក្រុមជម្រើស​ជាតិ​របស់​ខ្ញុំ។ បន្ទាប់​ពី​បាន​ពិគ្រោះ​បញ្ហា​ជាមួយ​អ្នក​ជំនាញ​ផ្សេងៗ យើង​បាន​សម្រេច​ចិត្ត​ថា អ្វី​ដែល​ល្អ​បំផុត​សម្រាប់ស្ថានភាព​នេះ​គឺ​ការ​វះកាត់។ នៅ​ទី​នេះ​ វា​មិនមែន​និយាយ​អំពី​ការ​ជ្រើសរើស​ជម្រើស​មួយ រឺ​ជម្រើស​ផ្សេង​ពី​នេះ​ទៀត​នោះ​ទេ វា​គឺ​ជា​ការ​ព្យាបាល។ អ្វីៗ​នឹង​ប្រសើរ​ឡើង​វិញ 100% ឲ្យ​បាន​ឆាប់​តាម​ដែល​អាច​ធ្វើ​ទៅ​បាន”។

គួរ​រំលឹក​ផង​ដែរ​ថា ក្រុម​ជម្រើស​ជាតិ​អ៊ុយរូហ្គាយ នឹង​ត្រូវ​ប៉ះ​ជាមួយ​កូរ៉េខាងត្បូង ព័រទុយហ្គាល់ និង​ហ្គាណា នៃ​ពូល H ក្នុង​ព្រឹត្តិការណ៍ World Cup ឆ្នាំ​នេះ។

ប្រភព: 90 Min