Connect with us

បាល់ទាត់អន្តរជាតិ

អតីត​កីឡាករ​របស់​ក្លឹប​ហង្សក្រហម​ប្រាប់ Arnold កុំ​ឲ្យ​បាក់​ទឹកចិត្ត និង​ព្យាយាម​ដណ្ដើម​កៅអី​នៅ​ក្រុម​ជម្រើស​ជាតិ

Published

on

អតីត​ខ្សែការពារ​របស់ក្រុម​ហង្សក្រហម Liverpool លោក Glen Johnson បាន​ប្រាប់ Trent Alexander-Arnold ថា គាត់​ត្រូវតែ​ឈប់​សោកស្តាយ​ចំពោះ​ខ្លួនឯង ប្រសិន​បើ​គាត់​នៅ​តែ​ចង់​លេង​ឲ្យ​ក្រុម​ជម្រើស​ជាតិ​អង់គ្លេស​បន្ត​​ទៀត។

ខណៈ​ពេល​ដែល​ជា​រឿយៗ Trent Alexander-Arnold ត្រូវ​បាន​គេ​ចាត់​ទុក​ថា ជា​ខ្សែ​ការពារ​ស្តាំ​ដ៏​ល្អ​បំផុត​នៅ​ក្នុង​ពិភពលោក​នា​ពេល​បច្ចុប្បន្ន​​នោះ គាត់​មិន​សូវ​មាន​ឱកាស​បង្ហាញ​សមត្ថភាព​ឡើយ​ជា​មួយ​ក្រុម​ជម្រើស​ជាតិ​អង់គ្លេស ដោយ​លោក Gareth Southgate ដែល​ជា​គ្រូ​បង្វឹក​ចូលចិត្ត​ជម្រើស​ផ្សេង​ទៀត​ដូចជា Kyle Walker, Reece James និង Kieran Trippier ជាដើម។

ចំណុច​នេះ​ត្រូវ​បាន​ធ្វើ​ឲ្យ​មជ្ឈដ្ឋាន​បាល់ទាត់​មាន​ការ​ចាប់​អារម្មណ៍​កាន់​តែ​ខ្លាំង ដោយ​ខ្សែការពារ​របស់​ក្លឹប​ហង្សក្រហម Liverpool បាន​ក្លាយ​ជា​ជម្រើស​ដែល​អង្គុយ​នៅ​កៅអី​បម្រុង ខណៈ​ដែល​​ក្រុម​ជម្រើស​ជាតិ​អង់គ្លេស​បាន​បរាជ័យ​ជា​បន្ត​បន្ទាប់ និង​មិន​ធ្លាប់​ឈ្នះ​សូម្បី​តែ​មួយ​ប្រកួត​នៅ​ក្នុង​វគ្គ​ជម្រុះ​ក្នុង​ពូល UEFA Nations League។

Glen Johnson បាន​និយាយ​ទៅ​កាន់ SafeBettingSites ដែល​ជាសារ​ផ្ញើទៅកាន់ Trent Alexander-Arnold ថា៖ “វា​មាន​រឿង​​ផ្សេង​ទៀត​នៅ​ពី​ក្រោយ។ អ្នក​កំពុង​បង្ហាញ​ខ្លួន​ក្នុង​ជម្រើស 11 នាក់​ដំបូង​របស់ Liverpool រៀងរាល់​សប្តាហ៍ ប៉ុន្តែ​មិនមែន​សម្រាប់​ជម្រើស​ជាតិ​អង់គ្លេស​រាល់​សប្តាហ៍​នោះ​ទេ”។

គាត់​បាន​បន្ថែម​ទៀត​ថា៖ “ប្រសិន​បើ​គាត់ (Arnold) សោកសៅ ហើយ​អាណិត​ខ្លួនឯង នោះ​វា​នឹង​កាន់តែ​អាក្រក់​ទៅៗ។ ​បើ​គាត់​ដឹង​ថា គាត់​មាន​ការងារ​ជា​ច្រើន​ដែល​ត្រូវ​ធ្វើ​ដើម្បី​ស្វែង​រក​ទម្រង់​លេង​របស់​គាត់​ឲ្យ​កាន់​តែ​ប្រសើរ នោះ​ខ្ញុំ​ប្រាកដ​ណាស់​ថា គាត់​នឹង​ត្រូវ​ក្លាយ​ជា​ជម្រើស​ដំបូងសម្រាប់​​ក្រុម​អង់គ្លេស​​ក្នុង​ពេល​ឆាប់ៗ​នេះ”។

ប្រភព: Metro

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២