អតីត​ខ្សែ​ប្រយុទ្ធ​ម្នាក់​​របស់​ក្លឹប Real Madrid ចង់​ឲ្យ Cristiano Ronaldo គិត​គូ​ពី​ការ​ចូល​និវត្តន៍​ពី​បាល់ទាត់

អតីត​ខ្សែប្រយុទ្ធ​ក្រុម​ជម្រើស​ជាតិ​អ៊ីតាលី និង​ធ្លាប់​ជា​អតីត​កីឡាករ​របស់​ក្លឹប Real Madrid លោក Antonio Cassano បាន​អំពាវ​នាវ​ឲ្យ​កីឡាករ​ឆ្នើម Cristiano Ronaldo ចូល​និវត្តន៍​ពី​បាល់ទាត់ ជា​ជាង​ការ​ប្រថុយ​ខ្លួន​បន្ត​នៅ​ជាកីឡាករ​បម្រុង​ស្ទើរ​គ្រប់​ប្រកួត ខណៈ​បច្ចុប្បន្ន​ខ្សែ​ប្រយុទ្ធ​រូប​នេះ​កំពុង​មាន​ទម្រង់​លេង​ធ្លាក់​ខ្លាំង​នៅ​ក្លឹប​បិសាចក្រហម Manchester United។

ជាមួយ​គ្នា​នេះ​ដែរ Cristiano Ronaldo បាន​ក្លាយ​ជា​ជម្រើស 11 នាក់​ដំបូង​នៃ​ការ​ប្រកួត​លីក​តែ​មួយ​ប្រកួត​ប៉ុណ្ណោះ​នៅ​រដូវកាល​នេះ ក្រោម​ការ​ដឹកនាំ​របស់​លោក Erik ten Hag ប៉ុន្តែ​កីឡាករ​វ័យ 37 ឆ្នាំ​រូប​នេះ នៅ​តែ​ស្ថិត​ក្នុង​នាម​ជា​កីឡាករ​សំខាន់​មិន​អាច​ខ្វះ​បាន​របស់​ក្រុម​ជម្រើស​ជាតិ​ព័រទុយហ្គាល់​សម្រាប់​ការ​ប្រកួត UEFA Nations League។

ទោះ​បី​ជា Cristiano Ronaldo បង្ហាញ​ខ្លួន​ជា​ធម្មតា​ជា​មួយ​ក្រុម​ជម្រើសជាតិ ប៉ុន្តែ​គាត់​ហាក់​ដូច​ជា​មិន​មែន​ជា​ម៉ាស៊ីន​រក​គ្រាប់​បាល់​ដូច​ពី​មុន​ឡើយ និង​បាន​ខកខាន​ឱកាស​ជា​ច្រើន​ពេល​ក្រុមជម្រើស​ជាតិ​ព័រ​ទុយហ្គាល់​ប៉ះ​ជា​មួយ​អេស្ប៉ាញ​កាល​ពី​ថ្ងៃ​អង្គារ​សប្ដាហ៍​នេះ។ ដូចគ្នា​នេះ​ដែរ ព័រទុយហ្គាល់​បាន​ចាញ់​ក្នុង​ការ​ប្រកួត​នោះ​ក្នុង​លទ្ធផល 1-0 ដែល​មាន​ន័យថា ពួកគេ​មិន​បាន​ឡើង​​ដល់​វគ្គពាក់​កណ្តាល​ផ្តាច់ព្រ័ត្រ​របស់ UEFA Nations League ឡើយ។ ទាំង​នេះ គឺ​ជា​ហេតុផល​ដែល Cassano មាន​អារម្មណ៍​ថា Cristiano Ronaldo មិន​អាច​ឈាន​ដល់​កម្រិត​ស្តង់ដារ​ដូចគាត់​កាល​ពី​មុន​ឡើយ ហើយ​គួរ​តែ​ដល់​ពេល​វេលា​ចុងក្រោយ​សម្រាប់​អាជីព​របស់​គាត់​ផង​ដែរ។

Cassano បានប្រាប់ Cabine Desportiva ថា៖ “ត្រង់​ចំណុច​នេះ Cristiano គួរ​តែ​ពេញចិត្ត និង​ទទួល​ស្គាល់​ខ្លួន​ឯង និង​យល់​ថា ប្រសិន​បើ​អ្នក​មិន​ឈាន​ដល់​កម្រិត​ណា​មួយ​ទេ អ្នក​គួរ​តែ​បញ្ចប់​វា។ Cristiano Ronaldo បាន​ឈ្នះ​គ្រប់​យ៉ាង ដែល​យើង​ត្រូវ​តែ​ទទួល​ស្គាល់។ ឈប់!… អ្នក​ត្រូវតែ​ឈប់ បើ​មិន​ដូច្នេះ​ទេ អ្នក​នឹង​ព្យាយាម​លេង​ជា​កីឡាករ​បម្រុង​តែ​ប៉ុណ្ណោះ”។

ប្រភព: Dailymail