Connect with us

បាល់ទាត់អន្តរជាតិ

Arsenal កំពុង​ព្រួយ​បារម្ភ​ខ្លាច Bukayo Saka ព្រម​ផ្ទេរ​ទៅ Manchester City

Published

on

ក្លឹប​កាំភ្លើងធំ Arsenal កំពុង​ព្យាយាម​ជម្រុញ​ឲ្យ​ Bukayo Saka ចុះ​ហត្ថលេខា​លើ​កុងត្រា​ថ្មី ខណៈ​ដែល​ពួកគេ​មាន​ការ​ព្រួយ​បារម្ភ​កាន់តែ​ខ្លាំង​ឡើង ដោយ​ការ​ដេញ​តាម​ប្រមាញ់​របស់​ក្លឹប​មេឃខៀវ Manchester City ទៅ​លើ​កីឡាករ​ឆ្នើម​សញ្ជាតិ​អង់គ្លេស​រូប​នេះ។

កិច្ច​ព្រមព្រៀង​បច្ចុប្បន្ន​របស់​កីឡាករ​វ័យ 21 ឆ្នាំ Bukayo Saka នឹង​ត្រូវ​ផុត​កំណត់​នៅ​ឆ្នាំ 2024 ហើយ Arsenal កំពុង​ជាប់គាំង​ក្នុង​ការ​ពិភាក្សា​បន្ត​កុងត្រា​ថ្មី​បន្ថែម​ជាមួយ Bukayo Saka និង​អ្នកតំណាង​របស់​គាត់។ ជា​មួយ​គ្នា​នេះ​ដែរ កាល​ពី​ខែ​កញ្ញា​កន្លង​ទៅ ក្លឹប​កាំភ្លើងធំ​បាន​បើក​កិច្ចពិភាក្សា​ជាមួយ Saka រួម​ជាមួយ​នឹង Gabriel Martinelli និង William Saliba ម្ដង​រួច​មក​ហើយ ប៉ុន្តែ​មិន​ទទួល​បាន​ផ្លែផ្កា​ចេញ​ពី​កីឡាករ​ទាំង​បី​រូប​នេះ​នៅ​ឡើយ​ទេ។

យ៉ាង​ណា​មិញ​បច្ចុប្បន្ន​នេះ ខ្សែ​ប្រយុទ្ធ​ស្លាប Bukayo Saka បាន​ដើរ​តួ​យ៉ាង​សំខាន់​ក្នុង​ការ​ជួយ​ឲ្យ​ក្លឹប​កាំភ្លើងធំ Arsenal មាន​ទម្រង់​លេង​ល្អ​ប្រសើរ និង​ខ្លាំង​ក្លា​ឡើង​វិញ ក្រោម​ការ​ដឹកនាំ​របស់​លោក Mikel Arteta នៅ​រដូវកាល​នេះ។

ទន្ទឹម​នឹង​នេះ​ដែរ ប្រភព​ជិតស្និទ្ធ​មួយ​បាន​បង្ហើប​ឲ្យ​ដឹង​ថា ក្លឹប Manchester City កំពុង​ព្យាយាម​យ៉ាង​សកម្ម ដើម្បី​បញ្ចុះបញ្ចូល Bukayo Saka ឲ្យ​ចុះ​ហត្ថលេខា​ផ្ទេរ​មក Etihad Stadium ហើយ​​ពួក​គេ​ជឿជាក់​ថា ខ្សែ​ប្រយុទ្ធ​ស្លាប​​រូប​នេះ​នឹង​មាន​អនាគត​ត្រចះត្រចង់​ក្លឹប​នៅ​ពេល​ខាង​មុខ។

ប្រភព: 90 Min

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២