បាល់ទាត់អន្តរជាតិ

PSG កំពុងត្រៀមនាំយក N’Golo Kante ត្រឡប់ទៅប្រទេសបារាំងវិញ

Published

6 months ago

October 5, 2022

Lee Lee

ខ្សែបម្រើ N’Golo Kante បានត្រៀមខ្លួនរួចជាស្រេច ដើម្បីដើរចេញពីក្លឹបតោខៀវ Chelsea លើការផ្ទេរដោយគ្មានតម្លៃខ្លួន ប្រសិនបើក្លឹបមិនអាចឈានដល់ការបន្តកុងត្រាថ្មីរយៈពេលវែងនៅ Stamford Bridge តាមការចង់បានរបស់គាត់ទេនោះ។

កីឡាករសញ្ជាតិបារាំងរូបនេះនឹងផុតកុងត្រានៅដំណាច់នៃរដូវកាលនេះ ហើយគាត់នឹងមានសេរីភាពក្នុងការចុះហត្ថលេខាជាមួយក្លឹបថ្មីដែលគាត់ចង់ទៅនៅថ្ងៃទី 1 ខែមករា ឆ្នាំក្រោយ។ Kante ដែលបច្ចប្បន្នមានវ័យ 31 ឆ្នាំបានរងរបួសក្នុងរយៈពេល 3 រដូវកាលចុងក្រោយ ដោយ 3 រដូវកាលនោះ គាត់បានបង្ហាញខ្លួនត្រឹមតែ 66 ប្រកួតប៉ុណ្ណោះក្នុងលីគ។

ទោះជាយ៉ាងណាក៏ដោយ N’Golo Kante នៅតែជាខ្សែបម្រើដ៏មានទេពកោសល្យ និងប្រសិទ្ធភាពបំផុតក្នុងពិភពបាល់ទាត់ ហើយក្លឹបតោខៀវ Chelsea នៅតែមានចិត្តចង់រក្សាទុកគាត់ដដែល។ ដូចគ្នានេះដែរ ក្លឹបតោខៀវបានផ្តល់កុងត្រាថ្មីដល់គាត់រយៈពេលពីរឆ្នាំ ប៉ុន្តែត្រូវបានកីឡាករសញ្ជាតិបារាំង N’Golo Kante បដិសេធ ដោយគាត់ចង់បានកុងត្រារយៈពេល 4 ឆ្នាំ ដែលស្រដៀងទៅនឹងអ្វីដែលក្លឹបបានប្រគល់ដល់ខ្សែការពារ Kalidou Koulibaly ដែរ។

ក្រៅពីនេះក្លឹបយក្សបារាំង Paris Saint-Germain កំពុងតាមដានស្ថានភាពរបស់ Kante ហើយពួកគេសុខចិត្តផ្តល់ជូនខ្សែបម្រើរូបនេះនូវកុងត្រាដែលយូរតាមការចង់បានរបស់គាត់។ ប្រសិនបើគ្រប់យ៉ាងដំណើរការទៅដោយរលូន នោះគាត់នឹងត្រឡប់ទៅប្រទេសបារាំងដែលជាស្រុកកំណើតរបស់គាត់វិញ។

ប្រភព: 90 Min