Lionel Messi បញ្ជាក់​ថា World Cup ឆ្នាំ​នេះ គឺ​ជា​លើក​ចុង​ក្រោយ​សម្រាប់​គាត់

កាល​ពី​ពេល​ថ្មីៗ​នេះ តារា​ឆ្នើម Lionel Messi បាន​បញ្ជាក់​ថា ព្រឹត្តិការណ៍ World Cup នៅ​ឆ្នាំ 2022 នេះ​នឹង​ក្លាយ​ជា​ការ​បង្ហាញ​ខ្លួន​លើក​ចុងក្រោយ​របស់​គាត់​នៅ​ក្នុង​ការ​ប្រកួត​នោះ​ជា​មួយ​នឹង​ក្រុម​ជម្រើស​ជាតិ​អាហ្សង់ទីន។

ទន្ទឹម​នឹង​ការ​ដែល​ក្លាយ​ជា​កីឡាករ​ដ៏​លេច​ធ្លោរ​បំផុត​ក្នុង​ពិភព​បាល់ទាត់​នោះ គិត​មក​ទល់​នឹង​ពេល​នេះ Lionel Messi មិន​ទាន់​ធ្លាប់​បាន​លើកពាន World Cup នៅ​ឡើយ​ទេ ដោយ​គ្រាន់​តែ​ធ្លាប់​បាន​ដឹកនាំ​ក្រុម​ជម្រើស​ជាតិ​របស់​គាត់​ឡើង​ដល់​វគ្គផ្តាច់ព្រ័ត្រ​ម្ដង កាល​ពី​ឆ្នាំ 2014 និង​បាន​បរាជ័យ​ក្នុង​លទ្ធផល 1-0 ជាមួយ​នឹង​ក្រុម​ជម្រើស​ជាតិ​អាឡឺម៉ង់។ ពីរ​ដង​ផ្សេង​ទៀត ក្រុម​ជម្រើស​ជាតិ​អាហ្សង់ទីន​របស់ Messi បាន​ឡើង​ដល់​ត្រឹម​វគ្គ 8 ក្រុម​ចុងក្រោយ​នៅ​ឆ្នាំ 2006 និង 2010។

ប្រសិន​បើ Lionel Messi ឈ្នះ​ការ​ប្រកួត​នៅ​ប្រទេស​កាតា​ចុង​ឆ្នាំ​នេះ គាត់​នឹង​អាច​សម្រេច​បំណង​ដ៏​ធំ​មួយ​របស់​ខ្លួន សម្រាប់​ក្រុម​ជម្រើស​ជាតិ ក៏​ដូច​ជា​ប្រជាជន​អាហ្សង់ទីន។ មជ្ឈដ្ឋាន​បាល់ទាត់​ពិត​ជា​ចង់​ឃើញ​ម្នាក់​ក្នុង​ចំណោម​តារា​ឆ្នើម​ពីរ​រូប​ដែល​មាន Lionel Messi និង Cristiano Ronaldo ដែល​អាច​លើក​ពាន World Cup សម្រាប់​ប្រទេស​របស់​គាត់។

យ៉ាង​ណា​ក្ដី ទោះ​បី​ជា Lionel Messi អាច​ឈ្នះពាន FIFA World Cup រឺ​អត់​ក៏​ដោយ គាត់​នៅ​តែ​ត្រូវ​តែ​ឈប់​លេង​ជា​មួយ​ក្រុម​ជម្រើស​ជាតិ​អាហ្សង់ទីន សម្រាប់​ការ​ប្រកួត World Cup នៅ 4 ឆ្នាំ​ក្រោយ​មក​ទៀត ខណៈ​ដែល​បច្ចុប្បន្ន​គាត់​ពិត​ជា​វ័យ​កាន់​តែ​ចាស់ (35 ឆ្នាំ) ទៅ​ហើយ។

នៅ​ពេល​ត្រូវ​បាន​គេ​សួរ​ថា តើ World Cup នៅ​កាតា​នឹង​ក្លាយ​ជា​ការ​ប្រកួត​ចុងក្រោយ​របស់​គាត់​ទេ? Messi បាន​ប្រាប់​ទៅ​កាន់ Star+ ថា វា​ជា​ការ​ពិត​ដែល​នោះគឺ​ជា​​បង្ហាញ​ខ្លួន​ជា​លើក​ចុងក្រោយ​សម្រាប់​គាត់។ Messi ក៏​បាន​បន្ថែម​ថា ក្រុម​ជម្រើស​ជាតិ​របស់​គាត់​កំពុង​ស្ថិត​ក្នុង​ភាព​លេចធ្លោរ ប៉ុន្តែ​អ្វីៗ​មិន​ដូច​ការ​គិត​ទុក​ឡើយ ហើយ​ការ​ប្រកួត World Cup ពិត​ជា​ពិបាក​ខ្លាំង​ណាស់។

ប្រភព: 90 Min