Pjanic រិះគន់​អតីត​គ្រូ​បង្វឹក​លោក Ronald Koeman ថា គ្មាន​វិធី​សាស្ត្រ​ក្នុង​ការ​ហ្វឹកហាត់​អ្វី​ឡើយ

ខ្សែ​បម្រើ Miralem Pjanic បាន​ផ្ទេរ​ទៅ​ចូលរួម​ជា​មួយ​ក្លឹប Barcelona ក្នុង​កិច្ច​ព្រមព្រៀង​ដោះដូរ​ជាមួយ​ខ្សែបម្រើ​ប្រេស៊ីល Arthur Melo។ គាត់​បាន​មក​ដល់​ទឹកដី Camp Nou ក្នុង​នាម​ជា​កីឡាករ​ដែល​ត្រូវ​បាន​គេ​ចាត់​ទុក​ថា ជា​ខ្សែបម្រើ​ដ៏​ឆ្នើម​ម្នាក់ ប៉ុន្តែ​ទម្រង់​លេង​របស់​គាត់​នៅ​​ប្រទេស​អេស្ប៉ាញ​មិន​គាប់​ប្រសើរ​ឡើយ។

ជីវិត​របស់ Miralem Pjanic បាន​រសាត់​អណ្ដែត​ជា​យូរ និង​ត្រូវ​បាន​ក្លឹប​ដាក់​ឲ្យ​ខ្ចី​ជើង​ទៅ​ក្លឹប​ផ្សេង និង​ចុងក្រោយ​បាន​ចូល​រួម​ជា​មួយ Sharjah FC។ ដោយ​ឡែក​ថ្មីៗ​នេះ Pjanic បាន​វាយ​បក​រិះ​គន់​ទៅ​លើ​អតីត​គ្រូ​បង្វឹក​របស់​ខ្លួន​លោក Ronald Koeman ដោយ​លើក​ឡើង​ថា គ្រូ​បង្វឹក​រូប​នេះ​គ្មាន​វិធីសាស្រ្ត​ហ្វឹកហាត់​ទាល់​តែ​សោះ។

ថ្លែង​ទៅ​កាន់​សារ​ព័ត៌មាន​អេស្ប៉ាញ​មួយ Pjanic បាន​និយាយ​ថា៖ “ខ្ញុំ​ពិត​ជា​ភ្ញាក់​ផ្អើល នៅ​ពេល​ដែល​ខ្ញុំ​បាន​​ហ្វឹកហាត់​ជាមួយ​លោក Ronald Koeman។ ការ​ប្រកួត​មិន​ត្រូវ​បាន​រៀបចំ​ទុក ក្រុម​គ្មាន​ថាមពល គ្មាន​យុទ្ធសាស្ត្រ និង​គ្មាន​គំនិត​អ្វី​ឡើយ”។

ដោយ​ឡែក Ronald Koeman បាន​ដឹកនាំ Barcelona ជាង​មួយ​ឆ្នាំ​ប៉ុណ្ណោះ ហើយ​ក៏​ត្រូវ​បាន​បណ្ដេញ​ចេញ​ពី​តំណែង។ ដូចគ្នា​នេះ​ដែរ Pjanic ត្រូវ​បាន​ចុះហត្ថលេខា​នៅ​ខែ​មិថុនា ឆ្នាំ 2020 ពីរ​ខែ​មុន​ការ​តែងតាំង​របស់​គ្រូ​បង្វឹក​សញ្ជាតិ​ហូឡង់​រូប​នោះ។ អំឡុង​ពេល​លេង​នៅ Barcelona កីឡាករ​សញ្ជាតិ​បូស្នៀ Miralem Pjanic បាន​បង្ហាញ​ខ្លួន​តែ 19 ប្រកួត​ប៉ុណ្ណោះ ហើយ​បាន​ចំណាយ​ពេល​ភាគ​ច្រើន​នៃ​រដូវកាល​ឆ្នាំ 2021-22 ក្នុង​ការ​ខ្ចីជើង​នៅ Besiktas ​ប្រទេស​ទួរគី។

ប្រភព: Goal