Messi ទទួល​បាន​ការ​គោរព​ស្រឡាញ់ ទោះ​បី​ជា​នៅ​ប្រទេស​ព័រទុយហ្គាល់​ដែល​ជា​ប្រទេស​កំណើត​របស់ Cristiano Ronaldo

អ្នកគាំទ្រ​របស់​តារា​ឆ្នើម Lionel Messi បាន​ប្រមូល​ផ្តុំគ្នា​នៅ​ខាង​ក្រៅ​សណ្ឋាគារ​នៃ​ទីក្រុង Lisbon ហើយ​បាន​ស្រែក​ហៅ​ឈ្មោះ​របស់​គាត់ មុន​ពេល​នៃ​ការ​ប្រកួត​របស់ Paris Saint-Germain (PSG) ជាមួយ Benfica កាល​ពី​​ថ្ងៃ​ទី 06 ដើម​ខែ​នេះ។

សូម្បី​តែ​នៅ​ប្រទេស​កំណើត​របស់ Cristiano Ronaldo ក៏ Lionel Messi ហាក់​ទទួល​បាន​នូវ​​ការ​គោរព​យ៉ាង​ខ្លាំង​ពី​អ្នកគាំទ្រ​បាល់ទាត់។ ដូចគ្នា​នេះ​ដែរ យោង​តាម​សារ​ព័ត៌មាន Le Parisien បាន​ឲ្យ​ដឹង​ថា អ្នក​គាំទ្រ​បាន​ចាប់​ផ្តើម​ស្រែក​ហៅ​ឈ្មោះ Messi ក្នុង​ពេល​ទន្ទឹង​រង់ចាំការ​មក​ដល់​របស់​គាត់ ដែល​ធ្វើ​ឲ្យ​មាន​ការ​ភ្ញាក់​ផ្អើល​ជា​ខ្លាំង​នៅ​ក្នុង​មជ្ឈដ្ឋាន​អ្នក​ស្នេហា​វិស័យ​កីឡា​បាល់ទាត់។

PSG នឹង​ជួប Benfica ក្នុង​ការ​ប្រកួត UEFA Champions League ពូល H របស់​ពួកគេ​ម្ដង​ទៀត​នៅ​ម៉ោង 2 រំលង​អាធ្រាត​នេះ ខណៈ​ដែល​ការ​ប្រកួត​លើក​ទីមួយ​នៅ​ទឹកដី Benfica ក្រុម​ទាំង​ពីរ​បាន​បញ្ចប់​ទៅ​ដោយ​លទ្ធផល 1 ទល់​នឹង 1។

យ៉ាង​ណា​មិញ​នៅ​រដូវកាល​នេះ Lionel Messi ហាក់​ដូច​ជា​មាន​​ទម្រង់​លេង​ល្អ​ប្រសើរ​ឡើង​វិញ និង​បាន​ដើរ​តួ​យ៉ាង​សំខាន់​ដល់​ជ័យ​ជម្នះ​ជា​បន្ត​បន្ទាប់​របស់​ក្លឹប PSG។ ផ្ទុយ​មក​វិញ Cristiano Ronaldo ហាក់​ដូច​ជា​មិន​សូវ​កាក់​កប​​ឡើយ ដោយ​គាត់​ទើប​តែ​ស៊ុត​បញ្ចូល​ទី​បាន​មួយ​គ្រាប់​ប៉ុណ្ណោះ​នៅ​ក្របខណ្ឌ Premier League និង​បាន​ចំណាយ​ពេល​វេលា​ភាគ​ច្រើន​អង្គុយ​នៅ​កៅអី​បម្រុង។

ប្រភព: Sportskeeda