Real Madrid មិន​មាន​គម្រោង​ចង់​បាន Kylian Mbappe បន្ត​ទៀត​ឡើយ

ក្លឹប​អធិរាជស Real Madrid ត្រូវ​បាន​គេ​រាយការណ៍​មក​ថា មិន​មាន​គម្រោង​ក្នុង​ការ​ចាប់​អារម្មណ៍​ជា​ថ្មី​ម្ដង​ទៀត ចំពោះ​ខ្សែប្រយុទ្ធ​របស់​ក្លឹប Paris Saint-Germain គឺ​កីឡាករ Kylian Mbappe នោះ​ទេ។

កាល​ពី​ដើម​ឆ្នាំ​កន្លង​មក​ក្លឹប Real Madrid បាន​ធ្វើ​ការ​យ៉ាង​នឿយ​ហត់​ដើម្បី​ព្យាយាម​នាំយក​កីឡាករ​វ័យ 23 ឆ្នាំ​រូប​នេះ​មក​កាន់ Bernabeu ប៉ុន្តែ​ទី​បំផុត​គាត់​បាន​ចុះ​កុងត្រា​ថ្មី​រយៈពេល 3 ឆ្នាំ​ជាមួយ PSG ដែល​ជា​ក្លឹប​ម្ចាស់​ជើង​ឯក Ligue 1។

យ៉ាង​ណា​មិញ Kylian Mbappe បាន​ចាប់​ផ្តើម​រដូវកាល​ឆ្នាំ 2022-23 នេះ​ក្នុង​ទម្រង់​លេង​ល្អ​គួរ​សម​ក្រោម​ការ​ដឹកនាំ​របស់​លោក Christophe Galtier ដោយ​ស៊ុត​បញ្ចូលទី​បាន 12 គ្រាប់ ក្នុង​ការ​បង្ហាញ​ខ្លួន 13 ប្រកួត​នៅ​គ្រប់​ក្របខណ្ឌ​ទាំង​អស់​របស់​ក្លឹប។

ដោយ​ឡែក​របាយការណ៍​ជា​ច្រើន​បាន​លើក​ឡើង​ថា Mbappe កំពុង​មាន​អារម្មណ៍​ថា​គាត់​បាន​ធ្វើ​ខុស​ដោយ​ការ​ចុះហត្ថលេខា​លើ​កិច្ច​ព្រមព្រៀង​ថ្មី​នៅ Parc des Princes ហើយ​គាត់​នឹង​ព្យាយាម​ចាកចេញ​ពី​ក្លឹប​នៅ​ខែ​មករា​ឆ្នាំ 2023។

Kylian Mbappe បាន​ចោទ​ប្រកាន់​ក្លឹប​របស់​ខ្លួន​ថា ក្បត់​នឹង​សន្យា​ជា​មួយ​គាត់ ទាក់​ទង​នឹង​ការ​ដាក់​ឲ្យ​គាត់​លេង​បាន​ទៀង​ទាត់​​ជា​និច្ច​​ក្រោម​ការ​ដឹកនាំ​របស់​លោក Christophe Galtier និងបន្ថែម​​ឥទ្ធិពល​របស់​គាត់​នៅ Parc des Princes។

យោង​ទៅ​តាម​របាយការណ៍​ពី Marca បាន​ឲ្យ​ដឹង​ថា ក្រុម​របស់​លោក Carlo Ancelotti មិន​មាន​បំណង​ចង់​ចូល​រួម​ក្នុង​ការ​ប្រជែង​ចង់​បាន​លើ​ខ្សែ​ប្រយុទ្ធ​រូប​នោះ​ទៀត​ឡើយ។ ស្រប​ពេល​ជា​មួយ​គ្នា​នេះ​ដែរ ក្លឹប​ហង្សក្រហម Liverpool ត្រូវ​បាន​គេ​មើល​ឃើញ​ថា ចាប់​អារម្មណ៍​ចង់​បាន Mbappe ប៉ុន្តែ​បើ​តាម​ភាព​ជាក់​ស្ដែង​ក្លឹប​ហង្សក្រហម​ប្រហែល​ជា​មិន​ព្យាយាម​ផ្ទេរ​កីឡាករ​សញ្ជាតិ​បារាំង​នោះ​ទេ បន្ទាប់​ពី​ពួក​គេ​បាន​ចំណាយ​ប្រាក់​យ៉ាង​ច្រើន​ទៅ​លើ Darwin Nunez។

ប្រភព: Sportsmole