Lukaku នឹង​អវត្តមាន​ការ​ប្រកួត​ជើងទីពីរ​ជាមួយ Real Madrid ក្នុង​វគ្គ 8 ក្រុម​ចុងក្រោយ​នៃក្របខ័ណ្ឌ Champions League

ខ្សែប្រយុទ្ធ Romelu Lukaku របស់​ក្លឹបតោខៀវ Chelsea នឹង​មិន​ធ្វើ​ដំណើរទៅ​កាន់​ទឹកដី Santiago Bernabeu របស់​ក្លឹប Real Madrid ឡើយ សម្រាប់​ការ​ប្រកួត​ក្នុង​ក្របខ័ណ្ឌ Champions League ជើងទី​ពីរ​របស់​ពួកគេ។

Romelu Lukaku ក៏​បាន​អវត្តមានក្នុង​ការ​ប្រកួត​មុន​រួច​មក​ហើយ ពេល​ដែល​តោខៀវ​ប៉ះ​នឹង Southampton ជាមួយ​នឹង​ជ័យជម្នះ 6-0 កាល​ពី​ថ្ងៃសៅរ៍​សប្ដាហ៍​មុន ខណៈ​ដែល​​គ្រូបង្វឹកលោក Thomas Tuchel បាន​ឲ្យ​ដឹង​ថា កីឡាករ​វ័យ 28 ឆ្នាំរូបនេះ កំពុង​មាន​បញ្ហា​របួស​មិន​ទាន់​ជា​នៅ​ឡើយ។

ដោយឡែក​ប្រធានក្រុម Cesar Azpilicueta ក៏​បាន​ខកខាន​ការ​ប្រកួត​កាល​ពី​ថ្ងៃសៅរ៍​ផង​ដែរ ពេល​ប៉ះ Southampton ដោយ​កីឡាករ​រូប​នេះ​បាន​ធ្វើ​តេស្តវិជ្ជមាន​ជម្ងឺ COVID-19 ប៉ុន្តែ​នឹង​អាច​ជាសះស្បើយ​មុន​ការ​ប្រកួត​មក​ដល់ ហើយ​អាច​ចូល​លេង​បាន​សម្រាប់​ការ​ប្រកួត​នៅ​ថ្ងៃ​ពុធ​ខាង​មុខ​នេះ។

គួរ​រំលឹក​ផង​ដែរ​ថា ក្លឹបតោខៀវ Chelsea បាន​ចាញ់​ក្រោម​ថ្វី​ជើង​របស់ Real Madrid កាល​ពី​ជើង​ទីមួយ កាល​ពី​សប្តាហ៍​មុន​ក្នុង​លទ្ធផល 3 ទល់នឹង 1 នៅកីឡដ្ឋាន Stamford Bridge ដែល​ខ្លួន​ជា​ម្ចាស់​ផ្ទះ។

ប្រភព: Daily Mail