បារាំង តាម​ទាន់​កំណត់ត្រា​របស់​អាហ្សង់ទីន ដែល​ជា​ប្រទេស​មាន​កីឡាករ​ឈ្នះ​ពាន Ballon d’Or ច្រើន​ជាង​គេ

ពានរង្វាន់ Ballon d’Or គឺ​ជា​ពាន​កីឡាករ​ឆ្នើម​បំផុត និង​ជា​ក្ដី​ប្រាថ្នា​របស់​កីឡាករ​គ្រប់​រូប។ ពាន​នេះ​ចាប់​ផ្ដើម​បង្កើត​ជា​លើក​ដំបូង​នៅ​ក្នុង​ឆ្នាំ 1956 និង​កំណត់​យក​អ្នក​ឈ្នះ​តែ​ម្នាក់​ប៉ុណ្ណោះ ហើយ​កីឡាករ​នោះ​ទៀត​សោត​គឺ​ជា​កីឡាករ​ដែល​មាន​ទម្រង់​លេង​លេច​ធ្លោរ​ខ្លាំង​ក្នុង​រយៈពេលពេញ​មួយ​រដូវកាល។

ម្ចាស់​ជ័យ​លាភី​ប្រាំពីរ​សម័យ​កាល Lionel Messi បាន​ក្លាយ​ជា​កីឡាករ​តែ​ម្នាក់​គត់​ដែល​ឈ្នះពាន​នេះ​ច្រើន​ជាង​គេ និង​តាម​ពី​ក្រោយ​ដោយ​គូប្រជែង​ប្រាំ​​សម័យកាល Cristiano Ronaldo។ ទោះ​ជាង​យ៉ាង​ណា សម្រាប់​ឆ្នាំ 2022 នេះ Lionel Messi មិន​មាន​ក្នុង​បញ្ជី​ឈ្នោះ​នៃ​ការ​ប្រជែង​ពាន​នេះ​ឡើយ ខណៈ​ដែល Cristiano Ronaldo ស្ថិត​នៅ​ក្នុង​ចំណាត់​ថ្នាក់​លេខ 20។

ដោយ​ឡែក​បន្ទាប់​ពី Karim Benzema បាន​ឈ្នះពាន Ballon d’Or នៅ​ឆ្នាំ​នេះ ប្រទេស​បារាំង, អាហ្សង់ទីន, ហូឡង់, ព័រទុយហ្គាល់ និង អាឡឺម៉ង់ មាន​កំណត់​ត្រា​កីឡាករ​ដែល​ឈ្នះពាន 7 ដង​ស្មើ​គ្នា។ ប៉ុន្តេ​អ្វី​ដែល​ខុស​ប្លែក​ជាង​គេ​នោះ គឺ​អាហ្សង់ទីន ដោយ​ពាន Ballon d’Or ទាំង​អស់​របស់​គេ​ឈ្នះ​តែ​លើ​កីឡាករ​ម្នាក់​ប៉ុណ្ណោះ គឺ Lionel Messi ហើយ​សូម្បី​តែ Diego Maradona ក៏​មិន​ធ្លាប់​បាន​កាន់​ពាន​នេះ​ដែរ។

សម្រាប់​ប្រទេស​បារាំង កីឡាករ​ដែល​ធ្លាប់​ឈ្នះ Ballon d’Or មាន​ដូច​ជា Raymond Kopa, Michel Platini, Jean-Pierre Papin, Zinedine Zidane និង Karim Benzema។ ឆ្នាំ​ដែល​កីឡាករ​របស់​ពួក​គេ​ឈ្នះ​នោះ​គឺ 1958, 1983, 1984, 1985, 1991, 1998 និង 2022។

ប្រទេស​ផ្សេង​ទៀត​ដែល​ធ្លាប់​ឈ្នះ Ballon d’or 7 ដង​ដែរ​នោះ គឺ​ហូឡង់៖ កីឡាករ​ដែល​ធ្លាប់​ឈ្នះ​មាន Johan Cruyff, Ruud Gullit, Marco van Basten។ ព័រទុយហ្គាល់៖ កីឡាករ​ដែល​ធ្លាប់​ឈ្នះមាន Eusebio, Luis Figo, Cristiano Ronaldo។ អាឡឺម៉ង់៖ កីឡាករ​ដែល​ធ្លាប់​ឈ្នះមាន Gerd Muller, Franz Beckenbauer, Karl-Heinz Rummenigge, Lothar Matthaus, Matthias Sammer។

ប្រភព: 90 Min