វីរបុរស​ក្លឹប​បិសាចក្រហម Peter Schmeichel ជឿជាក់​ថា PSG នឹង​មិន​អាច​ឈ្នះ UCL នៅ​រដូវកាល​នេះ​ទេ ព្រោះ​…

វីរបុរស​ក្លឹប​បិសាចក្រហម Manchester United លោក Peter Schmeichel ជឿជាក់​ថា ក្លឹប​យក្ស​បារាំង Paris Saint-Germain (PSG) នឹង​មិន​អាច​ឈ្នះ​ពានរង្វាន់ UEFA Champions League នៅ​រដូវកាល​នេះ​ទេ ដោយ​សារ​ប្រព័ន្ធ​ការពារ​​របស់​ពួក​គេ​លេង​មិន​បាន​ល្អ។

ដោយ​ឡែក​លោក Peter Schmeichel បាន​លើក​ឡើង​បែប​នេះ បន្ទាប់​ពី PSG បាន​យក​ឈ្នះ​ក្នុង​លទ្ធផល 7-2 នៅ​ក្នុង​ការ​ប្រកួត UEFA Champions League ទៅ​លើ​ក្លឹប Maccabi Haifa កាល​ពី​រំលង​អាធ្រាត​យប់​មិញ។

ជាមួយ​គ្នា​នេះ​ដែរ​ក្រុម​​របស់​លោក Christophe Galtier មាន​​ភាព​ល្អ​ប្រសើរ នៅ​តំបន់​ប្រយុទ្ធ ប៉ុន្តែ​​ពួក​គេ​នៅ​មាន​ប្រព័ន្ធ​នៃ​ការ​​ការពារខ្សោយ ខណៈ​ដែល​ក្លឹប Maccabi Haifa បាន​ព្យាយាម​ស៊ុត​ចំនួន 13 ដង ដែល​ក្នុង​នោះ 5 ដង​ត្រូវ​បាន​ស៊ុត​ចំ​គោលដៅ។

Schmeichel ដែល​មាន​ការងារ​ជា​​អ្នក​​វិភាគ​​សម្រាប់ CBS Sports បាន​និយាយ​ថា៖ “នៅ​ពេល​អ្នក​និយាយ​អំពី​ពួក​គេ​ឈ្នះ UEFA Champions League ខ្ញុំ​គិត​ថា បញ្ហា​របស់​ពួកគេ​បាន​បង្ហាញ​នៅ​ប្រកួត​នេះ។ ពួកគេ​អាច​ឈ្នះ 4-0 បាន តែ​ភ្លាមៗ​នោះ​គឺ​របូត 4-2 ។ ពួក​គេ​រក​គ្រាប់​បាល់​បាន​ច្រើន ហើយ​បាន​ឈ្នះ​ការ​ប្រកួត តែ​វា​មិន​អាច​កើត​ឡើង​បែប​នេះ​គ្រប់​ការ​ពេល​​នោះ​ឡើយ”។

លោក​បាន​បន្ថែម​ទៀត​ថា៖ “ខ្ញុំ​​គិត​​ថា​ពួក​គេ​ពិត​ជា​ខ្សោយ​បំផុត​​ក្នុង​ការ​ការពារ ហើយ​នោះ​ក៏​ដោយ​សារ​តែ​កីឡាករ​នៅ​តំបន់​ខាង​លើ​​ទាំង​បី​ផង​ដែរ​។ នៅ​ពេល​អ្នក​ទស្សនា​នៅ​កីឡដ្ឋាន នោះ​អ្នក​ឃើញ​ពី​របៀប​ដែល Messi, Neymar, Mbappe ចូលរួម​តិចតួច​ក្នុង​ការ​តាម​ដេញ​បាល់ និង​ជួយ​ការពារ។ ផ្ទុយ​មក​វិញ​ក្រុម​ផ្សេងទៀត​ដូច​ជា Bayern Munich, Man City ពួក​គេ​ទាំង​នោះ ប្រើប្រាស់​​កីឡាករ​ទាំង 11 នាក់ សម្រាប់​ជួយ​​​ការពារ ហើយ​ខ្ញុំ​គិត​ថា​នៅ​ក្នុង​បាល់ទាត់​សម័យ​ទំនើប​នេះ គឺ​ត្រូវ​ការ​ធ្វើ​បែប​ហ្នឹង”។

ប្រភព: Sportskeeda