គ្រូ​បង្វឹក​របស់ Sporting CP ប្រាប់​មូលហេតុ​ដែល​ពួក​គេ​មិន​អាច​ចុះ​ហត្ថលេខា​លើ Cristiano Ronaldo

គ្រូ​បង្វឹក​របស់​ក្លឹប Sporting CP លោក Ruben Amorim បាន​អះអាង​ថា ក្លឹប​​របស់​ខ្លួន​មិនមាន​ប្រាក់ ដើម្បី​ចុះ​ហត្ថលេខា​លើ​តារា​ឆ្នើម Cristiano Ronaldo មក​វិញ​ឡើយ បើ​ទោះ​បី​ជា​កីឡាករ​វ័យ 37 ឆ្នាំ​រូបនេះ​នឹង​ក្លាយ​ជា​កីឡាករ​ដែល​ផ្ទេរ​ដោយ​គ្មាន​តម្លៃ​ខ្លួន​ក៏ដោយ។

យ៉ាង​ណា​មិញ Cristiano Ronaldo បាន​ចាប់​ផ្តើម​អាជីព​បាល់ទាត់​របស់​គាត់​នៅ Sporting CP ដោយ​បាន​ផ្លាស់​មក​ទីក្រុង Lisbon នៅ​អាយុ 12 ឆ្នាំ ហើយ​បាន​បង្ហាញ​ខ្លួន​ជា​មួយ​ក្រុម​ឈុត​ធំ​ដំបូង​នៅអាយុ 17 ឆ្នាំ។ មួយ​ឆ្នាំ​ក្រោយ​មក គាត់​បាន​ចូល​រួម​ជាមួយ Manchester United ហើយ​ក៏​ចាប់​ផ្ដើម​ដើរ​ឆ្ពោះទៅ​រក​ភាព​អស្ចារ្យ​តាំង​ពី​ពេល​នោះ​មក។

ប៉ុន្តែ​ម្ចាស់​ពាន​រង្វាន់ Ballon d’Or ប្រាំសម័យ​រូប​នេះ បាន​ត្រឡប់​មក Manchester United វិញ​នៅ​ឆ្នាំ 2021។ យ៉ាង​ណា​មក​ដល់​រដូវកាល​ថ្មី​នេះ គាត់​មាន​ទម្រង់​លេង​មិន​សូវ​ល្អ​ឡើយ និង​បាន​ស្នើ​សុំ​ចាកចេញ​ក្នុង​អំឡុង​ពេល​ទីផ្សារ​នៃ​រដូវក្តៅ​កន្លង​ទៅ​ថ្មីៗ​នេះ។ បច្ចុបុ្បន្ន Cristiano Ronaldo កាន់​តែ​អស់​ឱកាស​ក្នុង​ការ​បង្ហាញ​សមត្ថភាព​នៅ​ក្រោម​ការ​ដឹកនាំ​របស់​គ្រូ​បង្វឹក​ថ្មី Erik ten Hag។ ជា​មួយ​គ្នា​នេះ​ដែរ ទំនាក់​ទំនង​របស់ Cristiano Ronaldo ជាមួយ​លោក Erik ten Hag ក៏​ស្ថិត​ក្នុង​ភាព​ប្រេះឆា​ផង​ដែរ។

ក្លឹប​យក្ស​មួយ​ចំនួន​រួម​ទាំង Bayern Munich និង Paris Saint-Germain បាន​បដិសេធ​មិន​ទទួល​យក​ការ​ចុះ​ហត្ថលេខា​លើ Cristiano Ronaldo ខណៈ​ដែល Sporting CP បាន​ស្វែងរក​វិធី​ដើម្បី​ចុះ​ហត្ថលេខា​លើ​ខ្សែ​ប្រយុទ្ធ​ឆ្នើម​រូប​នេះ។ ពាក្យ​ចចាម​អារ៉ាម​ពី​ការ​ផ្ទេរ Cristiano Ronaldo ទៅ​កាន់ Sporting CP ក៏​កើត​មាន​ឡើង​តាំង​ពី​ពេល​នោះ​មក។

ទោះ​ជា​យ៉ាង​ណា អ្វីៗ​ហាក់​ដូច​ជា​បាន​បញ្ចប់​ហើយ ដោយ​ថ្មីៗ​នេះ​គ្រូ​បង្វឹក​របស់​ក្លឹប Sporting CP បាន​លាត​ត្រដាង​ពី​ការ​ពិត​ថា ពួក​គេ​នឹង​មិន​ចុះ​ហត្ថលេខា​លើ Cristiano Ronaldo ឡើយ។ គ្រូ​បង្វឹក​លោក Ruben Amorim បាន​និយាយ​ថា៖ “គ្រប់​គ្នា​នៅ Sporting CP សុបិន​ចង់​នាំ​យក Cristiano Ronaldo ត្រឡប់​មក​វិញ។ ប៉ុន្តែ​យើង​មិន​មាន​លុយ ដើម្បី​បង់​ថ្លៃពលកម្ម​របស់​គាត់​ទេ។ ខ្ញុំ​​គិត​​ថា គាត់​សប្បាយ​ចិត្ត​នឹង​នៅ Manchester United ប៉ុន្តែ​​​បញ្ហា​នោះ​គឺ គាត់​មិន​មាន​ឱកាស​លេង”។

ប្រភព: 90 Min