បាល់ទាត់អន្តរជាតិ

Anthony Martial ត្រឡប់ចូលទីលានហ្វឹកហាត់វិញ មុនពេលប៉ះ Real Sociedad

Published

1 year ago

November 1, 2022

Lee Lee

ខ្សែប្រយុទ្ធ Anthony Martial បានត្រឡប់មកកាន់ទីលានហ្វឹកហាត់របស់ក្លឹបបិសាចក្រហម Manchester United ជាមួយមិត្តរួមក្រុមរបស់ខ្លួនវិញ បន្ទាប់ពីបានជាសះស្បើយពីរបួស មុនការប្រកួតពានរង្វាន់ Europa League ដែលត្រូវប៉ះជាមួយក្លឹបមកពីអេស្ប៉ាញ Real Sociedad។

កីឡាករសញ្ជាតិបារាំងរូបនេះបានជួបបញ្ហារបួសជាច្រើនដង នៅដើមរដូវកាលនេះ ហើយបញ្ហាចុងក្រោយរបស់គាត់ គឺរបួសទាក់ទងនឹងឆ្អឹងខ្នង និងបានធ្វើឲ្យគាត់អវត្តមានចាប់តាំងពីថ្ងៃទី 9 ខែតុលា មកម្ល៉េះ។

Anthony Martial បានខកខានការប្រកួត Premier League បួនលើកចុងក្រោយរបស់ក្លឹបបិសាចក្រហម Manchester United ទល់នឹង Newcastle United, Tottenham Hotspur, Chelsea និង West Ham United។ បន្ថែមពីនោះគាត់ក៏បានអាក់ខានការប្រកួត Europa League ពេលប៉ះជាមួយ Omonia និង Sheriff Tiraspol។

ខ្សែប្រយុទ្ធរូបនេះបានបង្ហាញខ្លួនត្រឹមតែ 4 ដងប៉ុណ្ណោះសម្រាប់បិសាចក្រហមនៅរដូវកាលនេះ ប៉ុន្តែទម្រង់លេងរបស់គាត់គួរឲ្យចាប់អារម្មណ៍ ដោយតែងតែបង្កើតឱកាស និងជួយដល់ក្រុមជម្រើសជាច្រើន ហើយបានស៊ុតបញ្ចូលទីបាន 3 គ្រាប់ និង Assists បាន 2 ដងផងដែរ។

យ៉ាងណាមិញថ្លែងនៅមុនការប្រកួត Premier League កាលពីថ្ងៃអាទិត្យជាមួយ West Ham United គ្រូបង្វឹករបស់ក្លឹបបិសាចក្រហមលោក Erik ten Hag បាននិយាយថា គាត់មានក្ដីសង្ឃឹមថា ខ្សែប្រយុទ្ធ Anthony Martial អាចចូលលេងបាន មុនការប្រកួត World Cup ឆ្នាំ 2022។

ថ្ងៃនេះ Anthony Martial ដែលជាអតីតកីឡាកររបស់ក្លឹន Monaco បានចូលហ្វឹកហាត់ជាធម្មតាជាមួយមិត្តរួមក្រុម ហើយត្រូវបានគេគិតថា គាត់នឹងអាចចូលលេងវិញបានពេលក្លឹបបិសាចក្រហមប៉ះជាមួយ Real Sociedad នៅថ្ងៃសុក្រសប្ដាហ៍នេះ។

ប្រភព: Sportsmole