ព័ត៌មាន​លម្អិត​ពី​ការ​ចាប់​ឆ្នោត​វគ្គ 16 ក្រុម​ចុង​ក្រោយ​នៃ​ពាន​រង្វាន់ UEFA Champions League

ការ​ចាប់​ឆ្នោត UEFA Champions League វគ្គ 16 ក្រុម​​ចុង​ក្រោយ​នឹង​ធ្វើ​ឡើង​នៅ​ House of European Football ក្នុង​ទីក្រុង Nyon ប្រទេស​ស្វីស នៅ​ថ្ងៃ​ច័ន្ទ ទី 7 ខែវិច្ឆិកា។ ពិធី​នេះ​ចាប់ផ្តើម​នៅ​ម៉ោង 12:00 CET ដែល​ជា​ម៉ោង 11 ព្រឹក នៅ​ចក្រភព​អង់គ្លេស និង​ព័រទុយហ្គាល់។

ការ​ចាប់ឆ្នោត​ត្រូវ​ធ្វើ​ឡើង​ដោយ​មាន​លក្ខខណ្ឌ​ ចែកចេញ​ជាពីរ​ផ្នែក ដោយ​ក្រុមឡើង​ពី​ពូល​ទាំង 8 គឺ​ក្រុម​លេខ​មួយ​ក្នុង​ពូល ត្រូវ​ប៉ះ​នឹង​ក្រុម​លេខ​ពីរ​ក្នុង​ពូល ហើយ​ក្រុម​ទាំង​នោះ​ជា​ក្រុម​ដែល​មិន​មែន​​ស្ថិត​ក្នុង​ប្រទេស​ជាមួយ​គ្នា និងមិន​ឡើង​ពី​ពូល​ជាមួយ​គ្នា។

ឧទាហរណ៍​ជាក់​ស្ដែង​ដូច​ជា​ក្លឹប​ហង្សក្រហម Liverpool ដែល​ជា​ក្រុម​លេខ​ពីរ​ក្នុង​ពូល A ដូច្នេះ​គេ​មិន​អាច​ជួប​នឹង Chelsea, Tottenham Hotspur និង Man City ឡើយ ព្រោះ​ជា​ក្រុម​នៅ​អង់គ្លេស​ដូចគ្នា។ Liverpool ក៏​មិន​អាច​ជួប​នឹង Napoli ដែរ ព្រោះ​ឡើង​ពី​ពូល A ដូចគ្នា។ ក្លឹប​ដែល​ហង្សក្រហម​អាច​ជួប​មាន​ដូច​ជា៖ Bayern Munich, Benfica, Porto និង Real Madrid។

ការ​ប្រកួត UEFA Champions League វគ្គ 16 ក្រុម​ចុង​ក្រោយ​នឹង​​ត្រូវ​ប្រកួត​ពីរ​ជើង ក្នុង​ដី និង​ក្រៅ​ដី។ ក្រៅ​ពី​នោះ ការ​ប្រកួត​ជើង​​ទី​មួយ​​គ្រោង​ធ្វើ​នៅ​ថ្ងៃ​ទី 14/15 រហូត​ដល់​ថ្ងៃ​ទី 21/22 ខែ​កុម្ភៈ។ ការ​ប្រកួត​ជើង​ទី​ពីរ​នឹង​ធ្វើ​ឡើង​នៅ​ថ្ងៃ​ទី 7/8 រហូត​ដល់​ថ្ងៃ​ទី 14/15 ខែ​​មីនា។

ប្រភព: UEFA