Van Dijk ប្រាប់​ឈ្មោះ​កីឡាករ​ម្នាក់ ដែល​គាត់​ចង់​លេង​ជា​មួយ​បំផុត

ខ្សែការពារ​សញ្ជាតិ​ហូឡង់ Virgil van Dijk បាន​បង្ហើប​ថា គាត់​មាន​បំណង​ចង់​លេង​ជាមួយ​កំពូល​តារា​ឆ្នើម​របស់​ក្លឹប​មេឃខៀវ Manchester City គឺ​កីឡាករ Kevin De Bruyne។

យ៉ាង​ណា​មិញ​បច្ចប្បន្ន Kevin De Bruyne ត្រូវ​បាន​គេ​ចាត់ទុក​ថា​ជា​ខ្សែបម្រើ​ប្រយុទ្ធ​ដ៏​ល្អបំផុត​មួយ​រូប​ក្នុង​ពិភពលោក ដោយ​គាត់​បាន​បង្ហាញ​ខ្លួន​យ៉ាង​លេច​ធ្លោរ​បំផុត​ចាប់​តាំង​ពី​បាន​ចូលរួម​ជាមួយ Manchester City កាល​ពី​ឆ្នាំ 2015។

De Bruyne បាន​ស៊ុត​បញ្ចូលទី​សរុប​បាន 89 គ្រាប់ សម្រាប់ Manchester City ក្នុង​ការ​បង្ហាញ​ខ្លួន 324 ប្រកួត និង​ធ្លាប់​បាន​ឈ្នះពាន Premier League ចំនួន 4 ដង។ ដូចគ្នា​នេះ​ដែរ Van Dijk ក៏​ជា​កីឡាករ​ម្នាក់​ដែល​ទទួល​បាន​ភាពជោគជ័យ​ដ៏​អស្ចារ្យ​ផង​ដែរ ជា​ពិសេស​ចាប់​តាំង​ពី​បាន​ចូលរួម​ជាមួយ Liverpool ក្នុង​ឆ្នាំ 2018 និង​ធ្លាប់​បាន​ឈ្នះ​ពានរង្វាន់​ធំៗ​ជា​ច្រើន។

ថ្មីៗ​នេះ Van Dijk បាន​បង្ហាញ​ពី​ការ​ពេញ​ចិត្ត​យ៉ាង​ខ្លាំង​ចំពោះ​សមត្ថភាព​របស់​ខ្សែបម្រើ Kevin De Bruyne ហើយ​អ្នក​ទាំង​ពីរ​ក៏​ត្រូវ​បាន​គេ​សង្កេត​ឃើញ​ថា មាន​ទំនាក់​ទំនង​ជា​មួយ​គ្នា​យ៉ាង​ល្អ​នៅ​ក្រៅ​ទីលាន​ផង​ដែរ។

Van Dijk បាន​ប្រាប់​លោក Gary Neville នៅ​លើ The Overlap ថា៖ “កីឡាករ​ម្នាក់​ដែល​ខ្ញុំ​មិន​ធ្លាប់​លេង​ជាមួយ​ពី​មុន​មក ប៉ុន្តែ​ចង់​លេង​ជាមួយ​គឺ Kevin De Bruyne។ គាត់​ពិត​ជា​អស្ចារ្យ​មិន​គួរ​ឲ្យ​ជឿ ហើយ​ប្រសិន​បើ​គាត់​នឹង​លេង​នៅ Liverpool យើង​នឹង​កាន់​តែ​នៅ​កម្រិត​ខ្ពស់​ជាង​អ្វី​ដែល​យើង​ធ្លាប់​ធ្វើ​បាន។ គាត់​​ពូកែ​បញ្ជូន​បាល់​ពី​ចម្ងាយ, ស៊ុត​បញ្ចូលទី​បាន​ច្រើន និង​មាន​លក្ខណៈ​សម្បត្តិ​គ្រប់​បែប​យ៉ាង​ជា​ខ្សែបម្រើ និង​ជាកីឡាករ​ឆ្នើម​នា​សម័យ​បច្ចុប្បន្ន”។

ប្រភព: Sportskeeda