Thomas Muller ផ្ញើសារ​ទៅ​កាន់ Gerard Pique នៅ​ពេល​ដឹង​ថា ខ្សែការពារ​រូប​នេះ​ប្រកាស​ចូលនិវត្តន៍

ខ្សែប្រយុទ្ធ Thomas Muller របស់​ក្លឹប Bayern Munich បាន​ផ្ញើសារ​មួយ​ទៅ​កាន់​ខ្សែការពារ Gerard Pique របស់​ក្លឹប​អ្នក​មាន​បុណ្យ Barcelona បន្ទាប់​ពី​កីឡាករ​អេស្ប៉ាញ​រូប​នេះ បាន​ប្រកាស​ចូល​និវត្តន៍​ពី​បាល់ទាត់​កាល​ពី​ប៉ុន្មាន​ថ្ងៃ​មុន។

Gerard Pique ដែល​មាន​វ័យ 35 ឆ្នាំ​បាន​ប្រកាស​ថា គាត់​នឹង​បញ្ចប់​អាជីព​បាល់​ទាត់​របស់​ខ្លួន បន្ទាប់​ពី​ការ​ប្រកួត​ចុងក្រោយ​របស់ Barcelona ជា​មួយ Almeria នៅ​ថ្ងៃ​សៅរ៍​ទី 5 សប្ដាហ៍​នេះ។ ដោយ​ឡែក​ខ្សែការពារ​រូប​នេះ​បាន​បញ្ចប់​អាជីព​​ដ៏​អស្ចារ្យ ដោយ​គាត់​បាន​បង្ហាញ​​ខ្លួន​សរុប​ចំនួន 615 ប្រកួត​ឲ្យ Barcelona។

គាត់​បាន​ឈ្នះ​ពានរង្វាន់ UEFA Champions League ចំនួន 4 ដង និង La Liga ចំនួន 8 ដង។ ក្រៅ​ពី​ការ​ឈ្នះពាន​ជាមួយ​ក្លឹប Pique ក៏​ធ្លាប់​ជា​ឈ្នះពាន World Cup សម្រាប់​ក្រុម​ជម្រើស​ជាតិ​អេស្ប៉ាញ​ម្ដង​ផង​ដែរ​កាល​ពី​ឆ្នាំ 2010។

ខ្សែ​ការពារ​ជើង​ចាស់​រូបនេះ​ធ្លាប់​ជា​គូ​ប្រជែង​ដ៏​ស្វិតស្វាញ​នៅ​លើ​ទីលាន​ជាមួយ Thomas Muller របស់​ក្លឹប Bayern Munich ហើយ​ពួក​គេ​ធ្លាប់​ប្រកួត​ប៉ះគ្នា​សរុប​ចំនួន 9 ដង ដោយ​ឈ្នះ 2 ស្មើ 1 និង​ចាញ់ 6 ប្រកួត។

យ៉ាង​ណា ក្រោយ​ពី​ការ​​ប្រកាស​ចូល​និវត្តន៍​របស់ Gerard Pique ខ្សែ​ប្រយុទ្ធ Thomas Muller បាន​ឆ្លើយ​តប​​សារ​ទៅ​គាត់​គណនី Twitter របស់​គាត់​ថា៖ “តែងតែ​ជា​គូ​ប្រកួត​ប្រជែង​ដ៏ស្វិត​ស្វាញ និង​ជា​កីឡា​ដ៏​អស្ចារ្យ​ម្នាក់។ ជា​អ្នក​ឈ្នះ និង​ជា​​កំពូល​កីឡាករ​ប្រចាំ​ការ​ប្រកួត​របស់​យើង។ សូមអរគុណ @Gerard Pique”។

ប្រភព: Sportskeeda