Paul Scholes ថា ប្រសិន​បើ Garnacho បាន​ទៅ​លេង​ជាមួយ Messi នៅ​ក្រុម​ជម្រើស​ជាតិ​នោះ​កាន់​តែ​ប្រសើរ

អតីត​វីរបុរស​របស់​ក្លឹប Manchester United លោក Paul Scholes បាន​លើក​ឡើង​ថា ឱកាស​របស់ Alejandro Garnacho ក្នុង​ការ​លេង​ជាមួយ Lionel Messi អាច​ជា​ឫស​គល់​មួយ ដែល​ធ្វើ​ឲ្យ​កីឡាករ​វ័យ​ក្មេង​រូប​នេះ​កាន់​តែ​មាន​ទម្រង់​លេង​ល្អ​ប្រសើរ និង​ទំនុក​ចិត្ត​នៅ​លើ​ទីលាន​​ជាង​មុន។

យ៉ាង​ណា​មិញ​កីឡាករ​​វ័យ​ក្មេង​សញ្ជាតិ​អាហ្សង់ទីន ​Alejandro Garnacho បច្ចុប្បន្ន​​កំពុង​​ស្ថិត​​ក្នុង​រដូវកាល​ថ្មី​នៅ Old Trafford ជាមួយ​ក្រុម​ឈុត​ធំ​របស់​ក្លឹប​បិសាចក្រហម ខណៈ​ដែល​កាល​ពី​រដូវកាល​មុន​ខ្សែ​ប្រយុទ្ធ​ស្លាប​រូប​នេះ​នៅ​លេង​ជា​មួយ​ក្រុម​យុវជន និង​បាន​ជួយ​​មិត្ត​រួម​ក្រុម​របស់​ខ្លួន​ឲ្យ​ឈ្នះ FA Youth Cup ផង​ដែរ។

Garnacho បាន​បង្ហាញ​ខ្លួន​ចំនួន 5 ដង​សម្រាប់​ក្លឹប​បិសាចក្រហម​នៅ​រដូវកាល​នេះ​ក្រោម​ការ​ដឹកនាំ​របស់​លោក Erik ten Hag និង​បាន​ស៊ុតបញ្ចូលទី​គ្រាប់​ដំបូង​របស់​ខ្លួន​ក្នុង​ជ័យជម្នះ​នៅ Europa League កាល​ពី​ម្សិលមិញ ទៅ​លើ​ក្រុម​អេស្ប៉ាញ Real Sociedad។

ទោះ​ជា​យ៉ាង​ណា​ក៏​ដោយ Paul Scholes ដែល​ធ្លាប់​ជា​កីឡាករ​ឆ្នើម​មួយ​រូប បាន​មើល​ឃើញ​ថា Alejandro Garnacho ហាក់​ដូច​ជា​មិន​ទាន់​មាន​ទំនុក​ចិត្ត​គ្រប់​គ្រាន់​ឡើយ​នៅ​លើ​ទីលាន។ Paul Scholes អះអាង​ថា ឱកាស​របស់ Garnacho ក្នុង​ការ​ទៅ​ហ្វឹកហាត់​ជាមួយ Lionel Messi ក្នុង​ក្រុម​ជម្រើស​ជាតិ​អាហ្សង់ទីន អាច​នឹង​ធ្វើ​ឲ្យ​កីឡាករ​វ័យ​ក្មេង​រូប​នេះ​​មាន​ទំនុក​ចិត្ត​ខ្លាំង​ជាង​មុន។

ដោយ​ឡែក​ខ្សែ​ប្រយុទ្ធ​ស្លាប Alejandro Garnacho គឺ​ជា​មិត្ត​រួម​សញ្ជាតិ​របស់ Lionel Messi ប៉ុន្តែ​អ្នក​ទាំង​ពីរ​មិន​ធ្លាប់​បាន​បង្ហាញ​ខ្លួន​នៅ​លើ​ទីលាន​ជា​មួយ​គ្នា​ឡើយ ព្រោះ​កីឡាករ​ទាំង​ពីរ​ហាក់​ដូច​ជា​ខុស​ជំនាន់​គ្នា។ ទោះ​ជា​យ៉ាង​ណា​ក៏​ដោយ​ប្រសិន​បើ​ក្រុម​ជម្រើស​ជាតិ​អាហ្សង់ទីន​ពិចារណា​កោះហៅ Garnacho ឲ្យ​ចូលរួម​លេង​ក្នុង​ព្រឹត្តិការណ៍ World Cup ឆ្នាំ​នេះ នោះ​អាច​ជា​ឱកាស​ដែល​គាត់​នឹង​លេង​ក្នុង​ក្រុមជម្រើស​ជាតិ​ជាមួយ Lionel Messi។

ប្រភព: Mirror