ក្រុម​ជម្រើស​ជាតិ 5 ដែល​មាន​ខ្សែ​ប្រយុទ្ធ​មុតស្រួច​បំផុត

ការ​ប្រកួត FIFA World Cup 2022 នឹង​ចាប់​ផ្ដើម​ក្នុង​រយៈពេល​តិច​ជាង​ពីរ​សប្តាហ៍។ វា​ជា​ពេល​វេលា​ដ៏​រំភើប​មួយ​សម្រាប់​អ្នក​គាំទ្រ​បាល់ទាត់ ខណៈ​ដែល​កីឡាករ​ក្នុង​ក្រុម​ជម្រើស​ជាតិ​នីមួយៗ​បាន​រៀបចំ​ខ្លួន ដើម្បី​ប្រយុទ្ធ​នៅ​លើ​ទីលាន​ដ៏​អស្ចារ្យ​ក្នុង​អាជីព​បាល់ទាត់​របស់​ខ្លួន។

ជាមួយ​គ្នា​នេះ​ដែរ យើង​​នឹ​ង​ឃើញ​ក្រុម​បាល់ទាត់​អស្ចារ្យ​ជា​ច្រើននៅ​ក្នុង​ព្រឹត្តិការណ៍​នោះ ហើយ​ក្រុម​នីមួយៗ​មាន​លក្ខណៈ​ពិសេស​រៀងៗ​ខ្លួន។ ដោយ​ឡែក​ថ្ងៃ​នេះ​យើង​នឹង​លើក​យក​នូវ​ក្រុម​ជម្រើស​ជាតិ​ទាំង 5 ដែល​មាន​ខ្សែ​ប្រយុទ្ធ​គ្រោះ​ថ្នាក់​បំផុត ហើយ​អាច​បង្ករ​ព្យុះ​ភ្លៀង​នៅ FIFA World Cup ឆ្នាំ 2022 នេះ​ផង​ដែរ។

5. អាហ្សង់ទីន

អាហ្សង់ទីន ជា​ក្រុម​ជម្រើស​ជាតិ​ដែល​មាន​ខ្សែ​ប្រយុទ្ធ​ល្អៗ​ជា​ច្រើន ជា​ពិសេស​ពួក​គេ​មាន​ Lionel Messi។ ពួក​គេ​មាន​កីឡាករ​ដែល​ពោរពេញ​ដោយ​បទ​ពិសោធន៍​ដូចជា Angel Di Maria, Lautaro Martinez និង Paulo Dybala ជា​ដើម។

4. ព័រទុយហ្គាល់

ព័រទុយហ្គាល់​​នឹង​​បង្ហាញ​ខ្លួន​ជា​លើក​ទី​ប្រាំបី​នៅ World Cup ឆ្នាំ​នេះ។ លោក Fernando Santos ដែល​ជា​គ្រូ​បង្វឹក​ សង្ឃឹម​ថា​គាត់​អាច​ដឹកនាំ​ប្រទេស​របស់​ខ្លួន​ឲ្យ​ឈ្នះពាន World Cup ឆ្នាំ​នេះ។ ប្រទេស​នេះ​ក៏​មាន​ខ្សែ​ប្រយុទ្ធ​ជា​ច្រើន​ដូច​ជា Cristiano Ronaldo, Joao Felix និង Rafael Leao…។

3. អង់គ្លេស

លោក Gareth Southgate មាន​ការ​សម្រេច​ចិត្ត​មួយ​ចំនួន​ដ៏​ពិបាក ព្រោះ​អង់គ្លេស​សំបូរ​ដោយ​ធនធាន​ខ្សែ​ប្រយុទ្ធ​ល្អ​ៗ​ជា​ច្រើន។ យ៉ាង​ណា​ខ្សែ​ប្រយុទ្ធ​សំខាន់ៗ​ដែល​គេ​រំពឹង​ថា នឹង​បង្ហាញ​ខ្លួន​នៅ World Cup ឆ្នាំ​នេះ​មាន​ដូច​ជា Harry Kane, Phil Foden, Raheem Sterling, Mason Mount, Jack Grealish និង Bukayo Saka។

2. បារាំង

ប្រទេស​បារាំង គឺ​ជា​ក្រុម​ការពារ​តំណែង​ជើង​ឯក។ នៅ​ឆ្នាំ​នេះ ពួក​គេ​ក៏​នៅ​តែ​ជា​ក្រុម​ដែល​មាន​ខ្សែ​ប្រយុទ្ធ​ល្អៗ​ជា​ច្រើន​ដែរ ដែល​មាន​ដូច​ជា Karim Benzema, Kylian Mbappe និង Ousmane Dembele ជា​ដើម។

1. ប្រេស៊ីល

យើង​គ្រប់​គ្នា​បាន​ដឹង​ហើយ​ថា ក្រុម​ដែល​មាន​រហស្សនាម​ថា សាំ​បា​ប្រេស៊ីល គឺ​ជា​ប្រទេស​ដែល​សំបូរ​ដោយ​ធនធាន​កីឡាករ​ជា​ច្រើន​ជា​ពិសេស​ខ្សែ​ប្រយុទ្ធ​ដែល​មាន​ទេពកោសល្យ​ពូកែ​ញាក់​បាល់។ កីឡាករ​ដែល​លេង​តំណែង​ប្រយុទ្ធ​មាន​ដូចជា Neymar Jr, Vinicius Junior, Gabriel Jesus, Antony, Gabriel Martinelli, Raphinha, Richarlison និង Pedro ជា​ដើម។

ប្រភព: Sportskeeda