Patrice Evra ប្រាប់​ឲ្យ Van de Beek ចាកចេញ​ពី Old Trafford ដែល​ជា​ជម្រើស​មួយ​ល្អ​បំផុត

អតីត​កីឡាករ​របស់​ក្លឹប​បិសាចក្រហម Manchester United លោក Patrice Evra បាន​ជម្រុញ​ឲ្យ​ខ្សែបម្រើ Donny van de Beek ចាកចេញ​ពី Old Trafford ហើយ​ទៅ​កន្លែង​ផ្សេង​ដែល​គាត់​មាន​អារម្មណ៍​ថា​ខ្លួន​ស្រឡាញ់ រឺ​ពេញ​ចិត្ត។

Patrice Evra បាន​និយាយ​ថា Van de Beek រំលឹក​គាត់​ឲ្យ​នឹក​ឃើញ​ដល់​អតីត​ខ្សែបម្រើ​របស់​ក្លឹប Manchester United គឺ​កីឡាករ Henrikh Mkhitaryan ដែល​បច្ចុប្បន្ន​កំពុង​លេង​ឲ្យ​ក្លឹប Inter Milan។ Patrice Evra ថែម​ទាំង​បាន​បន្ថែម​ទៀត​ថា Van de Beek កំពុង​ខ្ជះខ្ជាយ​ពេល​វេលា​នៅ​ក្នុង​អាជីព​បាល់ទាត់​របស់​ខ្លួន។

យ៉ាង​ណា​មិញ​ពេល​នៅ​ជា​កីឡាករ​របស់ Ajax ខ្សែបម្រើ​​សញ្ជាតិ​ហូឡង់​រូប​នេះ​បាន​ចំណាយ​ពេល 5 ឆ្នាំ​ជា​កីឡាករ​ដ៏​សំខាន់ និង​លេចធ្លោរ​បំផុត ដោយ​បង្ហាញ​ខ្លួន​សរុប 175 ប្រកួត ដោយ​ស៊ុត​បញ្ចូលទី​បាន 41 គ្រាប់ ហើយ​ក៏​បាន​ឈ្នះពាន Eredivisie និងធ្លាប់​បាន​ជួយ​ក្រុម​ឲ្យ​ឡើង​ដល់​វគ្គពាក់​កណ្តាល​ផ្តាច់​ព្រ័ត្រ​នៃ​ក្របខ័ណ្ឌ UEFA Champions League កាល​ពី​ឆ្នាំ 2019 ផង​ដែរ។

ផ្ទុយ​ស្រឡះ ពេល​ដែល​គាត់ក្លាយ​ជា​កីឡាករ​របស់​ក្លឹប​បិសាចក្រហម Van de Beek បាន​បាត់​បង់​ទម្រង់​លេង និង​ឱកាស​បង្ហាញ​សមត្ថភាព​ស្ទើរតែ​ទាំង​ស្រុង ហើយ​ថែម​ទាំង​ត្រូវ​បាន​ក្លឹប​បិសាចក្រហម Manchester United ដាក់​ឲ្យ​ខ្ចីជើង​ទៅ​​ក្លឹប Everton ទៀត​ផង កាល​ពី​ពាក់កណ្តាល​នៃ​រដូវកាល​មុន។

ថ្មីៗ​នេះ​កីឡាករ​វ័យ 25 ឆ្នាំ​រូបនេះ​ទទួល​បាន​ឱកាស​ជា​ជម្រើស 11 នាក់​ដំបូង​នៃ​ការ​ប្រកួត Premier League កាល​ថ្ងៃអាទិត្យ​កន្លង​ទៅ ពេល​បិសាចក្រហម​ប៉ះ​ជា​មួយ Aston Villa ប៉ុន្តែ​គាត់​ទទួល​បាន​ការ​រិះគន់​យ៉ាង​ខ្លាំង ចំពោះ​ការ​បង្ហាញ​សមត្ថភាព​របស់​ខ្លួន ខណៈ​ដែល​ក្រុម​របស់​លោក Erik ten Hag បាន​រងបរាជ័យ 3-1 នៅ Villa Park។

ប្រភព: Dailypost NG