Lionel Messi បង្ហាញ​ក្ដី​សង្ឃឹម​ថា អាហ្សង់ទីន​នឹង​អាច​ឡើង​ដល់​វគ្គ​ផ្ដាច់​ព្រ័ត​ដូច​កាល​ពី​ឆ្នាំ 2014

មុន​ការ​ប្រកួត​បើក​ឆាក​ទល់​នឹង​ក្រុម​អារ៉ាប៊ីសាអូឌីត នៅ​ថ្ងៃ​អង្គារ​នេះ ប្រធាន​ក្រុម​អាហ្សង់ទីន Lionel Messi បាន​លើក​ឡើង​​ថា កីឡាករ​នៃ​ក្រុម​របស់​ខ្លួន​ដែល​មក​លេង​នៅ FIFA World Cup ឆ្នាំ 2022 នេះ ធ្វើ​ឲ្យ​គាត់​នឹក​ឃើញ​ដល់​ក្រុម​​ប្រកួត​កាល​ពី​ឆ្នាំ 2014 ដែល​ពេលនោះ​ពួក​គេ​បាន​ឡើង​ដល់​វគ្គ​ផ្ដាច់ព្រ័ត។

យ៉ាង​ណា​មិញ​ក្រុម​ពពក​ស​អាហ្សង់ទីន បាន​ឡើង​​ដល់​វគ្គ​ផ្ដាច់ព្រ័ត្រ​នៃ​ការ​ប្រកួត World Cup កាល​ពី 8 ឆ្នាំ​មុន ដែល​កាល​នោះ Lionel Messi ស្ទើរ​តែ​បាន​ឈ្នះពាន World Cup ជា​លើក​ដំបូង​របស់​ខ្លួន​ទៅ​ហើយ ប៉ុន្តែ​ត្រូវ​បាន​ចាញ់​ក្នុង​លទ្ធផល 1-0 ក្រោម​ថ្វី​ជើង​ក្រុម​ជម្រើស​ជាតិ​អាឡឺម៉ង់ ដោយ​ម្ចាស់​គ្រាប់​បាល់​គឺ​កីឡាករ Mario Gotze។ ចាប់​តាំង​ពី​ពេល​នោះ​មក អ្នក​គាំទ្រ​អាហ្សង់ទីន មាន​ការ​ខូច​ចិត្ត​ជា​ខ្លាំង និង​គិត​ថា Messi ប្រហែល​គ្មាន​វាសនា​អាច​លើក​ពាន World Cup ជាមួយ​ប្រទេស​របស់​ខ្លួន​នោះ​ឡើយ។

យ៉ាង​ណា​មិញ​ថ្ងៃ​នេះ​ពាក្យ​សម្ដី​របស់ Lionel Messi ហាក់​ដូច​ជា​បាន​ផ្តល់​នូវ​ក្តី​សង្ឃឹម​សារ​ជា​ថ្មី​ម្ដង​ទៀត ដោយ​ខ្សែប្រយុទ្ធ​របស់​ក្លឹប Paris Saint-Germain (PSG) រូប​នេះ​បាន​និយាយទៅ​កាន់​អ្នក​កាសែត Roy Nemer ថា ក្រុម​ជម្រើស​ជាតិ​របស់​គាត់​នៅ​ឆ្នាំ​នេះ ធ្វើ​ឲ្យ​គាត់​នឹក​ឃើញ​ក្រុម​របស់​គាត់​កាល​ពី​ឆ្នាំ 2014 ដែល​លេង​បាន​យ៉ាង​ល្អ ពិសេស​គឺ​ការ​សហការ​គ្នា​ជា​ក្រុម និង​បង្ហាញ​នូវ​ទម្រង់​លេង​ដ៏​អស្ចារ្យ​ផង​ដែរ។

ជា​ការ​ពិត​ណាស់ អាហ្សង់ទីន​នៅ​ពេល​នេះ​ត្រូវ​បាន​មជ្ឃដ្ឋាន​បាល់ទាត់​​គិត​ថា នឹង​អាច​ក្លាយ​ជា​ក្រុម​ដែល​ឈ្នះពាន World Cup នៅ​ឆ្នាំ​នេះ។ ក្រៅ​ពី Lionel Messi ពួក​គេ​មាន​កីឡាករ​ឆ្នើមៗ​ជា​ច្រើន​ដូច​ជា Lisandro Martinez, Cristian Romero, Angel Di Maria, Rodrigo De Paul, Lautaro Martinez និង Paulo Dybala ជា​ដើម។

ប្រភព: Sportskeeda