អេស្ប៉ាញ​លុត​កូស្តារីកា 7-0 ខណៈដែល​អាឡឺម៉ង់​ចាញ់​ជប៉ុន 2-1

ក្រុម​ជម្រើស​ជាតិ​អេស្ប៉ាញ​បាន​ឡើង​ទៅ​ឈរ​នៅ​កំពូល​តារាង​នៃ​ពូល E បន្ទាប់​ពី​ទទួល​បាន​ជ័យ​ជម្នះ​ដ៏​ធំធេង​ក្នុង​លទ្ធផល 7-0 ទៅ​លើ​កូស្តារីកា ក្នុង​ការ​ប្រកួត​បើក​ឆាក World Cup 2022 របស់​ខ្លួន​កាល​ពី​រំលង​ធ្រាត​យប់​មិញ​នេះ។

ខ្សែ​ប្រយុទ្ធ​ស្លាប Ferran Torres ដែល​លេង​ឲ្យ​ក្លឹប Barcelona ជា​អ្នក​រក​គ្រាប់​បាល់​បាន 2 គ្រាប់​ម្នាក់​ឯង ខណៈ​ដែល​ Dani Olmo, Marco Asensio, Gavi, Carlos Soler និង Alvaro Morata អាច​រក​គ្រាប់​បាល់​បាន​ម្នាក់ 1 គ្រាប់។

នៅ​ក្នុង​ពូល E ដូចគ្នា​នេះ​ដែរ ក្រុម​ជម្រើស​ជាតិ​ជប៉ុន​បាន​ធ្វើ​ឲ្យ​កក្រើក​ដល់​ពិភព​បាល់ទាត់​យ៉ាង​ខ្លាំង ដោយ​ពួក​គេ​បាន​យក​ឈ្នះ​ក្រុម​ខ្លាំង​ឥន្ទ្រី​ដែក​អាឡឺម៉ង់ ក្នុង​លទ្ធផល 2-1 និង​ដណ្ដើម​បាន 3 ពិន្ទុ នៅ​ក្នុង​ការ​ប្រកួត​បើក​ឆាក​របស់​ខ្លួន​ផង​ដែរ។

នៅ​ប្រកួត​បន្ទាប់ ក្រុម​ជម្រើស​ជាតិ​អាឡឺម៉ង់​នឹង​ត្រូវ​ធ្វើ​ការ​ធ្ងន់ ដោយ​ប៉ះ​ជា​មួយ​នឹង​ក្រុម​ជម្រើស​ជាតិ​អេស្ប៉ាញ ហើយ​ពួក​គេ​ត្រូវ​តែ​ព្យាយាម​យក​ជ័យ​ជម្នះ​ឲ្យ​បាន ដើម្បី​មាន​សង្ឃឹម​ឡើង​ទៅ​វគ្គ​បន្ទាប់។ ទោះ​ជា​យ៉ាង​ណា ប្រកួត​ចុងក្រោយ​ដែល​ក្រុម​ទាំង​ពីរ​បាន​ជួប​គ្នា​នៅ UEFA Nations League កាល​ពី​ឆ្នាំ 2020 អាឡឺម៉ង់ បាន​ចាញ់​អេស្ប៉ាញ​ក្នុង​លទ្ធផល 6-0 ឯណោះ។

ប្រភព: Sportsmole