Connect with us

បាល់ទាត់អន្តរជាតិ

គ្រូ Real Madrid ប្រាប់​ប្រធាន​ក្លឹប​ឲ្យ​ព្យាយាម​ចុះ​ហត្ថលេខា​លើ Declan Rice

Published

on

ក្លឹប​អធិរាជ​ស Real Madrid ត្រូវ​បាន​គេរាយ​ការណ៍​ថា បាន​ត្រៀម​ខ្លួន​រួច​ជា​ស្រេច ក្នុង​ការ​នាំយក​ខ្សែបម្រើ​កណ្តាល​របស់​ក្លឹប West Ham United គឺ​កីឡាករ Declan Rice នៅ​ក្នុង​អំឡុង​ពេល​ទីផ្សារ​ដោះដូរ​កីឡាករ​នា​រដូវក្តៅ​ខាង​មុខ​នេះ។

យ៉ាង​ណា​មិញ Declan Rice ត្រូវ​បាន​គេ​ដឹង​ថា នឹង​ចាកចេញ​ពី​ក្លឹប​ញញួរធំ West Ham នៅ​ពេល​ឆាប់ៗ​ខាង​មុខ ដើម្បី​ស្វែង​រក​ក្លឹប​ថ្មី​ដែល​មាន​ការ​ប្រកួត​ប្រជែង​ខ្ពស់​ជាង​មុន។ កីឡាករ​សញ្ជាតិ​អង់គ្លេស​រូប​នេះ នឹង​ក្លាយ​ជា​ការ​ចាប់​អារម្មណ៍​ពី​ក្លឹប​ធំៗ​ជា​ច្រើន ក្នុង​អំឡុង​ពេល​ទីផ្សារ​ដោះដូរ​កីឡាករ​នា​ខែ​មករា​ដើម​ឆ្នាំ​ក្រោយ ប៉ុន្តែ​តម្លៃ​ផ្ទេរ​របស់ Declan Rice នឹង​អាច​ឡើង​ដល់ 150 លានផោន​ឯណោះ។

Declan Rice នៅ​តែ​មាន​ទម្រង់​លេង​លេច​ធ្លោរ និង​ជា​ផ្នែក​មួយ​ដ៏​សំខាន់​ក្រោម​ការ​ដឹកនាំ​របស់​គ្រូ​បង្វឹក​លោក David Moyes បើ​ទោះ​បី​ជា​បច្ចុប្បន្ន​ក្លឹប West Ham ហាក់​ដូច​ជា​ដុន​ដាប​ខ្លាំង​ក៏​ដោយ។ ស្រប​ពេល​ជា​មួយ​គ្នា​នេះ​ដែរ យោង​តាម​របាយការណ៍​ពី El Nacional បាន​ឲ្យ​ដឹង​ថា លោក Carlo Ancelotti ដែល​ជា​គ្រូ​បង្វឹក​របស់ Real Madrid កំពុង​ពេញ​ចិត្ត​សមត្ថភាព​របស់ Declan Rice និង​ចង់​នាំ​យក​ខ្សែបម្រើ​ឆ្នើម​រូប​នេះ​មក​ទឹកដី​អេស្ប៉ាញ។

ដូចគ្នា​នេះ​ដែរ​លោក Carlo Ancelotti បាន​ជម្រុញ​ឲ្យ​ប្រធាន​ក្លឹប​លោក Florentino Perez ព្យាយាម​ធ្វើ​អ្វីៗ​គ្រប់​យ៉ាង​ដែល​ចាំបាច់ ដើម្បី​​អាច​​ចុះ​ហត្ថលេខា​លើ Declan Rice នៅ​អំឡុង​ពេល​ទីផ្សារ​ដោះដូរ​កីឡាករ​រដូវ​ក្តៅ​លើក​ក្រោយ​នេះ។

ប្រភព: Sportsmole

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២