Lionel Messi ស៊ុត 1 គ្រាប់ Assist 1 ជួយ​អាហ្សង់ទីន​ឈ្នះ​ម៉ិកស៊ិកូ 2-0 ដើម្បី​បន្ត​ក្ដី​សង្ឃឹម​ឡើង​ទៅ​វគ្គ​បន្ទាប់

បុរស​ឆ្នើម​របស់​ក្រុម​ជម្រើស​ជាតិ​អាហ្សង់ទីន Lionel Messi បាន​ជួយ​ឲ្យ​ក្រុម​ជម្រើស​ជាតិ​របស់​ខ្លួន​បាន​បន្ត​ក្តី​សង្ឃឹមក្នុង​ការ​ប្រកួត World Cup បន្ត​ទៀត ដែល​អាច​មាន​ឱកាស​ឡើង​ទៅ​កាន់​វគ្គ 16 ក្រុម​ចុងក្រោយ បន្ទាប់​ពី​ការ​ទទួល​បាន​ជ័យ​ជម្នះ 2-0 ទៅ​លើ​ក្រុម​ជម្រើស​ជាតិ​ម៉ិកស៊ិកូ។

ខ្សែប្រយុទ្ធ Lionel Messi គឺ​ជា​ម្ចាស់​គ្រាប់​បាល់​បើក​ឆាក​នៅ​ក្នុង​ការ​ប្រកួត​ដោយ​ស៊ុត​បញ្ចូលទី​ពី​ចម្ងាយ​ក្រៅ​ប្រអប់​គ្រោះថ្នាក់ នៅ​នាទីទី 64។ បន្ទាប់​ពី​ស៊ុត​បញ្ចូលទី​ហើយ Messi បាន Assist បាល់​ទៅ​ឲ្យ​ខ្សែបម្រើ Enzo Fernandez ស៊ុត 1 គ្រាប់​ថែម​ទៀត​នៅ​នាទីទី 87។

នៅ​ប្រកួត​បន្ទាប់ (ថ្ងៃទី 1 ខែ​ធ្នូ) ក្រុម​ជម្រើស​ជាតិ​អាហ្សង់ទីន​របស់​លោក Lionel Scaloni នឹង​ត្រូវ​ជួប​ជាមួយ​ក្រុម​ជម្រើស​ជាតិ​ប៉ូឡូញ ហើយ​ពួក​គេ​នៅ​តែ​ត្រូវ​រ៉ាប់រង​ភារកិច្ចធំ គឺ​ត្រូវ​ធ្វើ​យ៉ាង​ណា​ឲ្យ​ឈ្នះ​ក្នុង​ការ​ប្រកួត​នោះ​ដើម្បី​អាច​បន្ត​ដំណើរ​ទៅ​កាន់​វគ្គ​បន្ទាប់​ទៀត។ ទន្ទឹម​នឹង​នេះ​ដែរ ម៉ិកស៊ិកូ​បាន​ធ្លាក់​ទៅ​បាត​តារាង​ក្នុង​ពូល C ដែល​មាន​ត្រឹមតែ​មួយ​ពិន្ទុ​ប៉ុណ្ណោះ បន្ទាប់​ពី​ឆ្លង​កាត់​ការ​ប្រកួត 2 លើក​របស់​ខ្លួន ប៉ុន្តែ​ពួកគេ​នៅ​តែ​អាច​មាន​ឱកាស​ឡើង​ទៅ​វគ្គ 16 ក្រុម ប្រសិន​បើ​ឈ្នះ​ការ​ប្រកួត​ជាមួយ​អារ៉ាប៊ីសាអូឌីត​ហើយ​រក​បាន​គ្រាប់​បាល់​ច្រើន​គ្រាប់។

ប្រភព: Sportsmole