Azpilicueta ប្រាប់​មូលហេតុ​ដែល​គាត់​បដិសេធ​មិន​ផ្ទេរ​ទៅ Barcelona

ថ្មីៗ​នេះ​ខ្សែការពារ​ស្លាប Cesar Azpilicueta បាន​បង្ហាញ​នូវ​រឿង​រ៉ាវ​ពិត​មួយ​របស់​ខ្លួន​ថា គាត់​បាន​ច្រានចោល​ឱកាស​ដើម្បី​ចូលរួម​ជាមួយ​ក្លឹប​អ្នក​មាន​បុណ្យ Barcelona ដោយ​​សារ​តែ​ហេតុផល​សំខាន់ៗ​ពីរ ហើយ​វា​ពាក់​ព័ន្ធ​ជាមួយ​នឹង​គ្រួសារ​របស់​គាត់ និង​ជាមួយ​ប្រធាន​ក្លឹប​តោខៀវ Chelsea លោក Todd Boehly។

ជា​ការ​ពិត​ណាស់​ខ្សែ​ការពារ​វ័យ 32 ឆ្នាំ​រូបនេះ​ហាក់​ដូចជា​ចង់ចាកចេញ​ពី Chelsea នៅ​ពេល​ដែល​កុងត្រា​របស់​គាត់​ជិត​ផុត​កំណត់​នៅ​រដូវ​ក្តៅ​កន្លង​ទៅ។ ពេល​នោះ Azpilicueta បាន​ពិភាក្សា​អំពី​ការ​ផ្ទេរ​ទៅ Barcelona ជា​មួយ​គ្រូបង្វឹក​លោក Xavi Hernandez ផង​ដែរ ប៉ុន្តែ​នៅ​ទី​បំផុត​អ្វីៗ​មិន​អាច​កើត​ឡើង​ឡើយ ហើយ​ធ្វើ​ឲ្យ​ខ្សែការពារ​អេស្ប៉ាញ​រូប​នេះ​សម្រេច​ចិត្ត​នៅ Stamford Bridge បន្ត ជាមួយ​នឹង​ការ​ត​កុងត្រា​ថ្មី​រយៈពេល 2 ឆ្នាំ​បន្ថែម​ទៀត។

Azpilicueta បាន​ប្រាប់​ទៅ​កាន់ AS ថា៖ “ពេល​នោះ​នៅ Chelsea ខ្ញុំ​លេង​បាន​តិច​ជាង 30 ប្រកួត ហើយ​ខ្ញុំ​ហាក់​ដូចជា​បាន​ក្លាយ​ជា​កីឡាករ​ដែល​គ្មាន​តម្លៃ​ខ្លួន​រួច​ទៅ​ហើយ។ រឿង​បែប​នេះ មិន​ដែល​កើត​ឡើង​ក្នុង​ឆាក​ជីវិត​របស់​ខ្ញុំ​ទេ។ ប៉ុន្តែ​ប្រធាន​ក្លឹប​ថ្មី​បាន​មក​ដល់ ហើយ​ពួកគេ​បាន​បង្ហាញ​ពី​បំណង​ប្រើប្រាស់​​ខ្ញុំ​បន្ត​ទៀត”។

គាត់​បាន​និយាយ​បន្ថែម​ទៀត​ថា “ទីក្រុង​ឡុងដ៍ គឺ​ជា​ផ្ទះ​របស់​ខ្ញុំ ហើយ​កូន​របស់​ខ្ញុំ​និយាយ​ភាសា​អង់គ្លេស​បាន​ល្អ​ជាង​ភាសា​អេស្ប៉ាញ។ នៅ​ពេល​ខ្ញុំធ្វើ​ការ​សម្រេច​ចិត្ត​បែប​នេះ ខ្ញុំ​គិត​ថា Xavi យល់។ បើ​អ្វីៗ​ច្បាស់​លាស់ គាត់​ប្រាកដ​ជា​យល់​​ហើយ”។

ប្រភព: Metro