ម៉ារ៉ុក ទម្លាក់​អេស្ប៉ាញ និង​ឡើង​ទៅ​ជួប​ព័រទុយហ្គាល់​នៅ​វគ្គ 8 ក្រុម​ចុងក្រោយ

កាល​ពី​ម្សិលមិញ​នេះ ក្រុម​ជម្រើស​ជាតិ​ម៉ារ៉ុក បាន​ធ្វើ​ឲ្យ​ពិភពបាល់ទាត់​មាន​ការ​ភ្ញាក់​ផ្អើល​ជា​ខ្លាំង បន្ទាប់​ពី​ពួក​គេ​បាន​ទម្លាក់​ក្រុម​ជម្រើស​ជាតិ​អេស្ប៉ាញ​ដែល​ជា​ក្រុម​ខ្លាំង តាម​រយៈការ​ស៊ុតបាល់​ប៉េណាល់ទី ក្រោយ​ពេល​ក្រុម​ទាំង 2 ចប់​ការ​ប្រកួត​ដោយ​លទ្ធផល​ស្មើ 0-0 នៅ​កីឡដ្ឋាន Education City។

ជា​ការ​ពិត​ណាស់ ក្រុម​ជម្រើស​ជាតិ​ម៉ារ៉ុក​របស់​លោក Walid Regragui បាន​បង្ហាញ​នូវ​ទម្រង់​ការពារ​យ៉ាង​អស្ចារ្យ​ក្នុង​រយៈពេល 120 នាទី បើ​ទោះ​បី​ជា​អេស្ប៉ាញ​ព្យាយាម​គ្រប់​គ្រង​បាល់ និង​ប៉ុនប៉ង​ស៊ុត​ជា​ច្រើន​លើក​ច្រើន​សារ​ក៏​ដោយ។ មិន​អាច​រក​ឃើញ​អ្នក​ឈ្នះបាន ម៉ារ៉ុក និង​អេស្ប៉ាញ​បាន​ឈាន​ដល់​ការ​ទាត់បាល់​ប៉េណាល់ទី​កាត់​សេចក្ដី។

អ្វី​ដែល​គួរ​ឲ្យ​ចាប់​អារម្មណ៍​នោះ អេស្ប៉ាញ​មិន​បាន​ស៊ុតបាល់​ប៉េណាល់ទី​ចូល សូម្បី​តែ 1 គ្រាប់ ខណៈ​ដែល​អ្នក​ស៊ុត 3 នាក់​ដំបូង​គឺ​កីឡាករ Pablo Sarabia, Carlos Soler និង Sergio Busquets។ ជា​ចុងក្រោយ Achraf Hakimi បាន​ស៊ុត​បញ្ចូលទី​យ៉ាង​ក្លាហាន ដោយ​ប្រើស្ដាយ Panenka ដើម្បី​សម្រេច​វាសនា​នាំ​ម៉ារ៉ុក​ឡើង​ទៅ​វគ្គ​បន្ទាប់។ ម៉ារ៉ុក នឹង​ជួប​ជា​មួយ​ក្រុម​ជម្រើស​ជាតិ​ព័រទុយ​ហ្គាល់ នៅ​ថ្ងៃ​ទី 10 ខែ​ធ្នូ ដែល​ជា​ការ​ប្រកួត​វគ្គ 8 ក្រុម​ចុងក្រោយ។

ប្រភព: Sportsmole