Real Madrid ចាប់​អារម្មណ៍​លើ​ខ្សែ​ប្រយុទ្ធ​វ័យ 21 ឆ្នាំ​របស់​ក្រុម​ជម្រើស​ជាតិ​ព័រទុយហ្គាល់

ក្លឹប​អធិរាជស Real Madrid ត្រូវ​បាន​គេ​រាយការណ៍​ថា កំពុង​តាម​ដាន​ពី​ស្ថានភាព​របស់​ខ្សែប្រយុទ្ធ​សញ្ជាតិ​ព័រទុយហ្គាល់ និង​ជា​កីឡាករ​របស់​ក្លឹប Benfica គឺ​កីឡាករ Goncalo Ramos។ ខ្សែប្រយុទ្ធ​វ័យ 21 ឆ្នាំ​រូបនេះ​បាន​ធ្វើ​ឲ្យ​មាន​ការ​ចាប់​អារម្មណ៍​ជា​ខ្លាំង​នៅ​ក្នុង​ការ​ប្រកួត FIFA World Cup ថ្មីៗ​នេះ ខណៈ​ដែល​គាត់​បាន​បង្ហាញ​ខ្លួន​ជា​លើក​ដំបូង​ក្នុង​ការ​ប្រកួត​ទល់នឹង​ប្រទេស​ស្វីស​កាល​ពី​ថ្ងៃទី 6 ខែ​ធ្នូ​កន្លង​ទៅ។

Goncalo Ramos ត្រូវ​បាន​គ្រូ​បង្វឹក​ប្រើប្រាស់​ជំនួស​តារា​ឆ្នើម Cristiano Ronaldo នៅ​ក្នុង​ការ​ប្រកួត​នោះ ហើយ​គាត់​បាន​ស៊ុតបាល់​បញ្ចូលទី​យ៉ាង​អស្ចារ្យ ដោយ​រក​បាន 3 គ្រាប់​ម្នាក់​ឯង និង Assist បាន​ម្ដង​ថែម​ទៀត​ផង។

ទាំង​នេះ​បាន​ធ្វើ​ឲ្យ​គាត់​ទទួល​បាន​ភាព​ទាក់ទាញ​ភ្នែក​ពី​ក្លឹប​ធំៗ​ជាច្រើន​នៅ​ទូទាំង​ទ្វីប​អឺរ៉ុប ហើយ​បើ​តាម​របាយការណ៍​ពី Defensa Central បាន​ឲ្យ​ដឹង​ថា ក្លឹប​អធិរាជ​ស Real Madrid គឺ​ជា​មួយ​ក្នុង​ចំណោម​ក្លឹប​ជា​ច្រើន​ដែល​ចាប់​អារម្មណ៍​ខ្លាំង​លើ Goncalo Ramos។

យោងតាម​ស្ថានភាព​បច្ចុប្បន្ន Real Madrid ពិត​ជា​កំពុង​ស្វែងរក​ការ​ចុះ​ហត្ថលេខា​លើ​ខ្សែ​ប្រយុទ្ធ​ម្នាក់​នៅ​ខែ​មករា​ខាង​មុខ បន្ទាប់​ពី​បញ្ហា​របួស​របស់ Karim Benzema ដែល​កើត​ឡើង​ជា​ញឹកញាប់​នៅ​រដូវកាល​នេះ។ លើស​ពី​នេះ​ទៅ​ទៀត ខ្សែ​ប្រយុទ្ធ​សញ្ជាតិ​បារាំង Karim Benzema ក៏​នឹង​ឈាន​ចូល​វ័យ 35 ឆ្នាំ​ឆាប់ៗ​នេះ​ដែរ ដែល​មាន​ន័យ​ថា ពួក​គេ​ត្រូវ​តែ​នាំ​យក​កីឡាករ​ម្នាក់​មក​លេង​តំណែង​ជា​ខ្សែប្រយុទ្ធ​កណ្ដាល​ឲ្យ​បាន​កាន់​តែ​ឆាប់ តាម​ដែល​អាច​ធ្វើ​ទៅ​បាន។

ប្រភព: Sportskeeda