ក្លឹប​ធំៗ 3 នៅ​អង់គ្លេស ដាក់​សំណើរ​ដេញ​ថ្លៃ​ខ្សែការពារ​វ័យ 20 ឆ្នាំ​របស់​ក្រុម​ជម្រើស​ជាតិ​ក្រូអាត

ក្លឹប​បិសាចក្រហម Manchester United, Manchester City និង​តោខៀវ Chelsea ត្រូវបាន​គេ​រាយការណ៍​មក​ថា បាន​ដាក់​សំណើរ​ដេញ​ថ្លៃ ពាក់ព័ន្ធ​នឹង​ការ​ផ្ទេរ​ខ្សែការពារ​កណ្តាល​របស់​ក្លឹប RB Leipzig និង​ជា​កីឡាករ​របស់​ក្រុម​ជម្រើស​ជាតិ​ក្រូអាត Josko Gvardiol។

យ៉ាង​ណា​មិញ​កីឡាករ​វ័យ 20 ឆ្នាំ​រូបនេះ​កំពុង​មាន​ទម្រង់​លេង​យ៉ាង​ល្អ​ជា​ពិសេស​នៅ​ក្នុង​ព្រឹត្តិការណ៍ FIFA World Cup ឆ្នាំ 2022 ដោយ​លេង​បាន​ពេញ​ម៉ោង​នៃ​ការ​ប្រកួត​ចំនួន 5 របស់​ក្រូអាត​ពេល​ប៉ះ​ជាមួយ​ម៉ារ៉ុក, កាណាដា, បែលហ្សិក, ជប៉ុន និង​ប្រេស៊ីល។ អ្វី​ដែល​កាន់​តែ​ពិសេស​ជាង​នេះ​ទៅ​ទៀត​នោះ Josko Gvardiol បាន​បន្ត​ដំណើរ​ជាមួយ​ក្រុម​ជម្រើស​ជាតិ​នៅ​វគ្គ​ពាក់​កណ្តាល​ផ្តាច់ព្រ័ត្រ ដែល​ត្រៀម​នឹង​ប៉ះ​ជាមួយ​អាហ្សង់ទីន​នៅ​ប៉ុន្មាន​ថ្ងៃ​ខាង​មុខ​នេះ។

Josko Gvardiol មិន​ទាន់​បាន​សម្រេច​ចិត្ត​លើ​អនាគត​របស់​ខ្លួន ក្នុង​អំឡុង​ពេល​នេះ​ទេ ពោល​គឺ​អ្វីៗ​ត្រូវ​អូស​បន្លាយ​រហូត​ដល់​ក្រោយ​ការ​ប្រកួត World Cup។ ទោះ​ជា​យ៉ាង​នេះ​ក្ដី ខ្សែការពារ​ឆ្នើម​រូប​នេះ ត្រូវ​បាន​គេ​រំពឹង​ថា នឹង​ចាកចេញ​ពី​ក្លឹប​បច្ចុប្បន្ន​របស់​ខ្លួន RB Leipzig នៅ​ពេល​ឆាប់ៗ​ខាង​មុខ​នេះ។

យោងតាម​របាយការណ៍​ពី Foot Mercato បាន​ឲ្យ​ដឹង​ថា ក្លឹប​បិសាចក្រហម Manchester United, Manchester City និង​តោខៀវ Chelsea សុទ្ធតែ​បាន​ដាក់​សំណើរ​ផ្ទេរ​យក​ខ្សែ​ការពារ​កណ្តាល​រូប​នេះ។ របាយការណ៍​ដដែល​នេះ​ដែរ ក៏​បាន​អះអាង​ថែម​ទៀត​ថា សំណើរ​របស់​ក្លឹប Manchester United និង Chelsea មាន​ទំហំ​ទឹកប្រាក់​ចន្លោះ​ពី 90 លានអឺរ៉ូ (77.4 លានផោន) ដល់ 95 លានផោន (81.7 លានផោន) ខណៈ​ដែល Manchester City បាន​ដាក់​សំណើរ​ដេញ​ថ្លៃ​រហូត​ដល់ 100 លានអឺរ៉ូ (86 លានផោន)។

ប្រភព: Sportsmole