Arthur Melo បង្ហើប​ថា Lionel Messi ធ្លាប់​បាន​សរសើរ​គាត់​ថា​ជា…

អតីត​ខ្សែ​បម្រើ​របស់​ក្លឹប Barcelona និង Liverpool គឺ​កីឡាករ Arthur Melo បាន​រំលឹក​រឿង​អតីត​កាល​ដ៏​រំភើប​មួយ​របស់​ខ្លួន ដោយ​ត្រូវ​បាន​កីឡាករ​ឆ្នើម Lionel Messi សរសើរ​គាត់ ក្នុង​អំឡុង​ពេល​លេង​នៅ Barcelona ជាមួយ​គ្នា។ ខ្សែ​បម្រើ​សញ្ជាតិ​ប្រេស៊ីល​រូប​នេះ បាន​និយាយ​ថា គាត់​ទទួល​បាន​ការ​សរសើរ​ពី Messi ភ្លាមៗ បន្ទាប់​ពី​គាត់​បាន​ចុះ​ហត្ថលេខា​ផ្ទេរ​ទៅ​ចូលរួម​ជាមួយ Barcelona នៅ​រដូវ​ក្តៅ​ឆ្នាំ 2018។

យ៉ាង​ណា​មិញ ពីរ​ឆ្នាំ​ក្រោយ​មក Arthur Melo ត្រូវ​បាន Barcelona លក់​ចេញ ក្នុង​លក្ខខណ្ឌ​ដោះដូរ​ជាមួយ Miralem Pjanic ជាមួយ​នឹង​តម្លៃ 80.6 លានអឺរ៉ូ ទៅ Juventus។ ទោះ​ជា​យ៉ាង​ណា​ក៏​ដោយ Arthur Melo ត្រូវ​បាន​គេ​ចាត់​ទុក​ជា​កីឡាករ​ដ៏​សំណាង​ម្នាក់ ព្រោះ​ធ្លាប់​បាន​លេង​ជាមួយ​តារា​ឆ្នើម​ទាំង​ពីរ​រូប​គឺ Cristiano Ronaldo (នៅ Juventus) និង Lionel Messi (នៅ Bacelona)។

ក្រៅ​ពី​ការ​លេង​ជា​មិត្ត​រួម​ក្រុម​នឹង​កីឡាករ​ឆ្នើម Lionel Messi នោះ Arthur Melo ក៏​បាន​ទទួល​ការ​សរសើរ​ពី​កីឡាករ​អាហ្សង់​ទីន​រូប​នេះ​ថែម​ទៀត​ផង។ ថ្លែង​នៅ​ក្នុង​បទ​សម្ភាសន៍​ថ្មីៗ​នេះ​ជាមួយ SPORT ខ្សែបម្រើ Arthur Melo បាន​និយាយ​ថា៖ “Lionel Messi បាន​និយាយ​ថា​ខ្ញុំ​គឺ​ជា​មនុស្ស​ម្នាក់​ដែល​ធ្វើ​ឲ្យ​គាត់​ភ្ញាក់​ផ្អើល​បំផុត ក្នុង​ចំណោម​កីឡាករ​ចំណូល​ថ្មី​ទាំង​អស់​នៅ​ក្នុង​ឆ្នាំ 2018។ ខ្ញុំ​គិត​ថា​គាត់​និយាយ​លេង ព្រោះ​​ខ្ញុំទើប​តែ​មក​ដល់ Barcelona។ ពេល​នោះ​ខ្ញុំ​មាន​អារម្មណ៍​រំភើប​ចិត្ត​ណាស់។ បន្ទាប់​​មក នៅ​ក្នុង​បន្ទប់​ផ្លាស់​សំលៀកបំពាក់ ខ្ញុំ​បាន​និយាយ​ជាមួយ​គាត់​ផ្ទាល់ ហើយ​អរគុណ​គាត់”។

ប្រភព: Dailypost NG