អ្នកគាំទ្រ​មួយ​ចំនួន បង្ហាញ​អារម្មណ៍​មិន​ចង់​ឲ្យ Micah Burton ប្ដូរ​មក​លេង​ឲ្យ​ក្រុម​ជម្រើស​ជាតិ​កម្ពុជា

ថ្មីៗ​នេះ កីឡាករ​កូនកាត់​ខ្មែរ​អាមេរិក​ដែល​មាន​ឈ្មោះ​ថា Micah Burton កំពុង​ត្រូវ​បាន​អ្នក​ស្នេហា​វិស័យ​កីឡាបាល់ទាត់​ចាប់​អារម្មណ៍​ជា​ខ្លាំង ពិសេស​ក្នុង​អំឡុង​ពេល​ដែល​កីឡាករ​ឆ្នើម​រូប​នេះ បាន​ជាប់​ឈ្មោះ​នៅ​ក្នុង​ឈុត​យុវជន​ដែល​លេង​តំណាង​ឲ្យ​ក្រុម​ជម្រើស​ជាតិ​សហរដ្ឋ​អាមេរិក​ជា​ផ្លូវការណ៍។

Micah Burton គឺ​ជា​កីឡាករ​ដែល​ពាក់​លេខ 9 ជា​ខ្សែបម្រើ​ប្រយុទ្ធ U17 របស់​សហរដ្ឋអាមេរិក ដែល​ចូលរួម​ក្នុង​ការ​ប្រកួត FIFA World Cup 2023 អាយុ​ក្រោម 17 ឆ្នាំ។ កីឡាករ​ដែល​កើត​ក្នុង​ឆ្នាំ 2006 រូប​នេះ លេង​ក្នុង​តួនាទី​ជា​ខ្សែបម្រើ​ប្រយុទ្ធ។ ម្តាយ​របស់ Micah Burton មាន​ដើម​កំណើត​ខ្មែរ ហើយ​គាត់​កើត​នៅ​រដ្ឋ Minnesota សហរដ្ឋ​អាមេរិក។

សម្រាប់​ក្លឹប​បាល់ទាត់​អាជីព Micah Burton កំពុង​​លេង​ឲ្យ​ក្លឹប Austin FC II ក្នុង​លីគ​អាមេរិក MLS Next Pro។ គាត់​បាន​បង្ហាញ​ខ្លួន​ឲ្យ U17 សហរដ្ឋអាមេរិក​ចំនួន 18 ប្រកួត​មក​ហើយ ដោយ​ស៊ុតបញ្ចូលទី​បាន 5 គ្រាប់។

ប្រសិន​បើ Micah Burton ចង់​មក​លេង​ឲ្យ​ក្រុម​ជម្រើស​ជាតិ​កម្ពុជា ពិត​ជា​បាន ព្រោះ​គាត់​មាន​ដូនតា​ជា​ជន​ជាតិ​ខ្មែរ ហើយ​គាត់​ក៏​មិន​ទាន់​បង្ហាញ​ខ្លួន​ជា​មួយ​ក្រុម​ឈុត​ធំ​របស់​អាមេរិក​ដែរ។ ទោះ​ជា​យ៉ាង​ណា​ក៏​ដោយ អ្នកគាំទ្រ​មួយ​ចំនួន​បង្ហាញ​មតិ​យល់​ឃើញ​ដោយ​និយាយ​បែប​លេង​សើច​ថា “Micah Burton គួរ​តែ​លេង​ឲ្យ​ក្រុម​ជម្រើស​ជាតិ​អាមេរិក​ល្អ​ជាង​មក​ទទួល​បទ​ពិសោធន៍​ជាមួយ​ក្រុម​គោព្រៃ​កម្ពុជា”។ អ្នក​ខ្លះ​ទៀត​បាន​លើក​ឡើង​ថា “កុំមក​អី​ល្អ​ជាង នាំ​តែ​ខូច​អនាគត​ទេ”។

ប្រភព: ASEAN FOOTBALL