បាល់ទាត់អន្តរជាតិ
សហព័ន្ធកីឡាបាល់ទាត់នៃប្រទេសកាណាដា កំពុងទាក់ទងទៅអតីតគ្រូបង្វឹករបស់ Man United
សហព័ន្ធកីឡាបាល់ទាត់នៃប្រទេសកាណាដាកំពុងបន្តស្វែងរកគ្រូបង្វឹកថ្មី ដើម្បីដឹកនាំក្រុមជម្រើសជាតិរបស់ខ្លួន ត្រៀមសម្រាប់ការប្រកួត World Cup ឆ្នាំ 2026។ បន្ទាប់ពីការបដិសេធពីលោក Jose Mourinho និង Frank Lampard សហព័ន្ធកាណាដា បានផ្តើមការចរចាជាមួយបេក្ខភាពគ្រូបង្វឹក 2 រូបផ្សេងទៀត។
យោងតាមរបាយការណ៍ពីលោក Nizaar Kinsella បានឲ្យដឹងថា ជម្រើសអាទិភាពដែលអាចក្លាយជាគ្រូបង្វឹកថ្មីរបស់ក្រុមជម្រើសជាតិកាណាដា គឺអតីតគ្រូបង្វឹករបស់ក្លឹបបិសាចក្រហម Manchester United លោក Ole Gunnar Solskjaer ដែលគាត់មិនមានការងារធ្វើចាប់តាំងពីខែវិច្ឆិកា ឆ្នាំ 2021 មកម្ល៉េះ។
ប្រសិនបើកិច្ចព្រមព្រៀងជាមួយគ្រូបង្វឹកសញ្ជាតិន័រវេសរូបនេះ មិនបានសម្រេចទេ នោះអាចឈានដល់ជម្រើសទី 2 គឺលោក Jesse Marsch ដែលជាអតីតគ្រូបង្វឹកធ្លាប់ដឹកនាំក្លឹប Leeds, RB Leipzig និង Red Bull Salzburg។ គួរដឹងផងដែរថា ក្រុមជម្រើសជាតិកាណាដា គ្មានគ្រូបង្វឹកដឹកនាំចាប់តាំងពីលោក John Herdman បានលាលែងពីតំណែង ក្នុងខែកញ្ញា ឆ្នាំ 2023។ នៅរដូវក្តៅនេះ ប្រទេសកាណាដានឹងចូលរួមក្នុងការប្រកួត Copa America 2024 ដែលត្រូវប្រកួតប៉ះនឹងគូប្រជែងខ្លាំងៗជាច្រើនក្នុងពូលរបស់ពួកគេគឺ អាហ្សង់ទីន ឈីលី និងប៉េរូ។
ប្រភព: Dailysports