អតីត​កីឡាករ​ព័រទុយហ្គាល់ Deco លើក​ឡើង​ថា៖ ព័រទុយហ្គាល់​​មាន​​កីឡាករ​ល្អៗ​ច្រើន ប៉ុន្តែ​ពួកគេ​មិន​មាន Messi

ក្រុម​ជម្រើស​ជាតិ​អាហ្សង់ទីន​បាន​ឆ្លង​កាត់​ដំណើរ​ផ្សងព្រេង​ដ៏​អស្ចារ្យ ដើម្បី​ក្លាយ​ជាម្ចាស់ពាន FIFA World Cup កាល​ពី​ឆ្នាំ​មុន ហើយ​គ្រប់​គ្នា​​បាន​សម្លឹង​មើល​ឃើញ​កីឡាករ​ដ៏​សំខាន់​ម្នាក់​របស់​ពួក​គេ និង​ជា​កាពីតែន​ក្រុម​ផង​ដែរ គឺ Lionel Messi។ ពាក់​ព័ន្ធ​នឹង​រឿង​នេះ​ដែរ អតីត​កីឡាករ​ឆ្នើម​មួយ​រូប​របស់​ក្រុម​ជម្រើស​ជាតិ​ព័រទុយហ្គាល់ Deco បាន​និយាយ​ថា អាហ្សង់ទីន​នឹង​មិន​អាច​ឈ្នះ​ពាន FIFA World Cup 2022 នៅ​កាតា​បាន​ឡើយ បើ​គ្មាន​វត្តមាន​របស់ Messi។

យ៉ាង​ណា​មិញ Messi ត្រូវ​បាន​គេ​ចាត់​ទុក​ជា​កីឡាករ​ល្អ​បំផុត​ក្នុង​ប្រវត្តិសាស្ត្រ​បាល់ទាត់​ផង​ដែរ ខណៈ​ដែល​គាត់​បាន​ជួយអាហ្សង់ទីន​ឲ្យ​ឈ្នះពាន​ដ៏​អស្ចារ្យ​បំផុត​មួយ​នេះ​ជា​លើក​ទីបី​នៅ​ក្នុង​ប្រវត្តិសាស្ត្រ​បាល់ទាត់​របស់​ពួក​គេ។ ជាមួយ​គ្នា​នេះ​ដែរ អតីត​មិត្ត​រួម​ក្រុម Deco ដែល​ជា​កីឡាករ​សញ្ជាតិ​ព័រទុយហ្គាល់ និង​ធ្លាប់​លេង​នៅ Barcelona ជាមួយ​គ្នា​នោះ បាន​ចាត់​ទុក Messi ជា​មនុស្ស​ដ៏​សំខាន់ នៃ​ភាព​ជោគជ័យ​របស់​ក្រុម​ពពក​ស​អាហ្សង់ទីន។

ដោយ​ចាញ់​អារ៉ាប៊ីសាអូឌីត 2-1 ក្នុង​ការ​ប្រកួត​ដំបូង​របស់​ពួកគេ គ្រប់​គ្នា​គិត​ថា Messi នឹង​អស់​ឱកាស​ឈ្នះពាន World Cup ទៅ​ហើយ ហើយ​អាហ្សង់ទីន​ក៏​មិន​អាច​ឈាន​ជើង​ដល់​វគ្គ​ចុងក្រោយ​នៃ​ព្រឹត្តិការណ៍​នោះ​ដែរ។ ផ្ទុយ​មក​វិញ អាហ្សង់ទីន​បាន​ឡើង​ដល់​វគ្គ​ផ្ដាច់ព្រ័ត និង​យក​ឈ្នះ​ក្រុម​ជម្រើស​ជាតិ​បារាំង​ដោយ​បាល់​ប៉េណាល់ទីកាត់​សេចក្ដី។

Lionel Messi ដែល​ជា​កាពីតែន​ក្រុម​ឆ្នើម​មួយ​រូប បាន​ស៊ុត​បញ្ចូលទី 7 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 3 ដង។ ទន្ទឹម​នឹង​នេះ​ដែរ ប្រទេស​របស់ Deco ដែល​ដឹកនាំ​ដោយ Cristiano Ronaldo ត្រូវ​បាន​ធ្លាក់​ត្រឹម​វគ្គ 8 ក្រុម​ចុង​ក្រោយ ក្រោម​ស្នាដៃ​របស់​ម៉ារ៉ុក។

Deco ដែល​ធ្លាប់​បាន​លេង​ឲ្យ​ក្រុម​ជម្រើស​ជាតិ​ព័រទុយហ្គាល់​បាន 75 ប្រកួត​កាល​ពី​នៅ​ជា​កីឡាករ បាន​និយាយ​ថា ថ្វីត្បិត​តែ​ព័រទុយហ្គាល់​មាន​កីឡាករ​ល្អៗ​ជា​ច្រើន ប៉ុន្តែ​ពួកគេ​មិន​មាន Lionel Messi ទេ។ នៅ​ក្នុង​បទសម្ភាសន៍​ជាមួយ TR Sports របស់​អាហ្សង់ទីន គាត់​បាន​និយាយ​ថា៖ “អាហ្សង់ទីន​បាន​ឈ្នះ World Cup ដោយ​សារ​តែ​ពួក​គេ​មាន Messi។ សម្រាប់​​យើង (ព័រទុយហ្គាល់) មាន​ជំនាន់​កីឡាករ​ល្អ​បំផុត ប៉ុន្តែ​យើង​មិន​មាន Messi”។

ប្រភព: Dailypost NG