Lucas Vazquez បដិសេធ​មិន​ចង់​ចាកចេញ​ពី Real Madrid

ខ្សែការពារ Lucas Vazquez បាន​បង្ហើប​ឲ្យ​ដឹង​ថា គាត់​គ្មាន​បំណង​ចាកចេញ​ពី​ក្លឹប​អធិរាជស Real Madrid នា​ពេល​ខាង​មុខ​នេះ​ទេ។ យ៉ាង​ណា​មិញ កន្លង​មក​ក្រៅ​ពី​ការ​ខ្ចីជើង​ម្ដង​នៅ Espanyol កំឡុង​ឆ្នាំ 2014-2015 ខ្សែការពារ​ស្លាប​រូប​នេះ បាន​ចំណាយ​ពេល​នៃ​អាជីព​របស់​គាត់​ទាំង​ស្រុង​នៅ Real Madrid។

កីឡាករ​សញ្ជាតិ​អេស្ប៉ាញ​រូប​នេះ រក​បាន​គ្រាប់បាល់​សរុប​ចំនួន 33 គ្រាប់ និង 59 Assists ពី​ការ​បង្ហាញ​ខ្លួន​សរុប​ចំនួន 327 ប្រកួត។ ការ​បង្ហាញ​ខ្លួន​របស់ Lucas Vazquez ភាគច្រើន​គឺ​លេង​នៅ​តំបន់​ការពារ​ស្តាំ រឺ​​ខ្សែប្រយុទ្ធ​ស្លាប។ ទោះ​ជា​យ៉ាង​ណា​ក៏​ដោយ ពេល​នេះ​គាត់​មាន​អាយុ 32 ឆ្នាំ​ហើយ ជាមួយ​នឹង​កុង​ត្រា​របស់​គាត់​ក៏​ត្រូវ​ផុត​កំណត់​នៅ​ចុង​បញ្ចប់​នៃ​រដូវកាល​នេះ​ផង​ដែរ។

ដោយ​ឡែក Lucas Vazquez នៅ​តែ​ត្រូវ​បាន​ប្រើប្រាស់​ជា​ប្រចាំ​ដោយ​លោក Carlo Ancelotti ជាមួយនឹង​ការ​បង្ហាញ​ខ្លួន​ជា​ជម្រើស​ដំបូង 16 លើកនា​រដូវកាល​នេះ។ មុន​ពេល​នៃ​ការ​ប្រកួត UEFA Champions League របស់ Real Madrid ជាមួយ Union Berlin នា​រំលង​អាធ្រាត​នេះ Vazquez បាន​និយាយ​ទៅ​កាន់​ប្រព័ន្ធ​ផ្សព្វផ្សាយ​ថា អនាគត​របស់​គាត់ កំពុង​ស្ថិត​នៅ​លើ​ការ​ជជែក​ពិភក្សា និង​ពិចារណា​ជាមួយ​ក្លឹប។

យ៉ាង​ណា Lucas Vazquez បាន​បង្ហើប​ឲ្យ​ដឹង​ថា គាត់​ពិត​ជា​មិន​ចង់​ចាកចេញ​ពី Real Madrid ដែល​ជា​ក្លឹប​សំណព្វ​ចិត្ត​របស់​គាត់​ឡើយ។ ខ្សែការពារ​រូប​នេះ​បាន​និយាយ​ថា៖ “Real Madrid គឺ​ជា​ក្លឹប​នៃ​ក្តី​ស្រមៃ​របស់​ខ្ញុំ​តាំង​ពី​តូច វា​ជា​ផ្ទះ​របស់​ខ្ញុំ ហើយ​ខ្ញុំ​សប្បាយ​ចិត្ត​ណាស់​នៅ​ទីនេះ។… ខ្ញុំ​នៅ Real Madrid ជា​កន្លែង​ដែល​ខ្ញុំ​តែង​តែ​ចង់​នៅ ដូច្នេះ​ខ្ញុំ​នឹង​លះបង់​អ្វីៗ​ទាំងអស់​ដែល​ខ្ញុំ​មាន សម្រាប់​ក្លឹប​របស់​ខ្ញុំ”។

ប្រភព: Sportsmole