Fabregas ប្រាប់​បំណង​ចង់​ក្លាយ​ជា​គ្រូ​បង្វឹក​ម្នាក់​នៅ Premier League

អតីត​ខ្សែបម្រើ​របស់​ក្រុម​កាំភ្លើងធំ Arsenal និង Chelsea លោក Cesc Fabregas បាន​សារ​ភាព​ថា គាត់​មាន​បំណង​ប្រាថ្នា​ចង់​កាន់​ការងារ​ជា​គ្រូ​បង្វឹក​របស់​ក្លឹប​នៅ Premier League ពេល​ដែល​គាត់​ចូល​និវត្តន៍​ពី​បាល់ទាត់។

យ៉ាង​ណា​មិញ កីឡាករ​វ័យ 35 ឆ្នាំ​រូបនេះ​មិន​ទាន់​ឈប់​ប្រកប​អាជីព​បាល់ទាត់​នៅ​ឡើយ​ទេ ហើយ​គាត់​ទើបតែ​បាន​​បញ្ចប់​ការ​ផ្ទេរ​ដោយ​គ្មាន​តម្លៃ​ខ្លួន​ទៅ​កាន់​ក្លឹប Como នៃ​ក្របខ័ណ្ឌ Serie B (ប្រទេស​អ៊ីតាលី) បន្ទាប់​ពី​​ផុតកុងត្រា​ជា​មួយ​ក្លឹប AS Monaco។

ថ្លែង​ទៅ​កាន់ Sky Sports News ខ្សែបម្រើ Fabregas បាន​លើក​ឡើង​ថា៖ “នៅ​ពេល​ដែល​ខ្ញុំក្លាយ​ជា​គ្រូបង្វឹក ខ្ញុំ​អាច​និយាយ​បាន​ថា Premier League គឺ​ជា​លីគ​របស់​ខ្ញុំ។ វា​ជា​កន្លែង​ដែល​ខ្ញុំ​លេង​បាល់ទាត់​ល្អ​បំផុត ជា​ឆ្នាំ​ដ៏​ល្អ​បំផុត​របស់​ខ្ញុំ និង​ជា​កន្លែង​ដែល​មនុស្ស​មាន​ការ​គោរព​ខ្ញុំ​ច្រើន”។

Fabregas បាន​បន្ថែម​ទៀត​ថា៖ “ខ្ញុំ​​ចង់​ក្លាយ​ជា​គ្រូបង្វឹក​​នៅ Premier League 100 ភាគរយ។ ប្រសិនបើ​ខ្ញុំ​អាច​ស្រមើស្រមៃ​ពី​អនាគត ក្នុង​រយៈពេល​ប៉ុន្មាន​ឆ្នាំ​ខាងមុខ នោះ​ប្រាកដ​ណាស់ រឿង​នេះ​គឺ​ស្ថិត​ក្នុង​ខួរ​ក្បាល​របស់ខ្ញុំ​​ជានិច្ច”។

ប្រភព: Dailypost NG