Kevin De Bruyne រក​បាន​គ្រាប់​បាល់​តែត​បញ្ចូលទី​ជា​លើក​ដំបូង ក្នុង​ការ​ប្រកួត Premier League

ក្លឹប​មេឃខៀវ Manchester City បាន​ធ្វើ​ដំណើរ​ទៅ​ជួប​ក្រុម​ម្ចាស់​ផ្ទះ Brighton សម្រាប់​ការ​ប្រកួត​ជុំ​ទី 29 នៃ​ក្របខ័ណ្ឌ​កំពូល​របស់​អង់គ្លេស Premier League កាល​ពី​រំលង​អាធ្រាត​យប់​មិញ​នេះ។ ដោយ​ឡែក Man City បាន​ទទួល​លទ្ធផល​ដ៏​ល្អ​លើស​ការ​រំពឹង​ទុក ដែល​ពួក​គេ​បាន​លុត Brighton 4-0។

ងាក​មក​មើល​ការ​ប្រកួត​រវាង​ក្រុម​ទាំង​ពីរ Man City រក​បាន​គ្រាប់​បាល់​បើក​ឆាក នៅ​នាទី​ទី 17 ដែល​ជា​ការ​តែត​បញ្ចូល​ទី​ដ៏​ល្អ​ពី Kevin De Bruyne និង​សហការ​បញ្ជូន​បាល់​ពី​ស្លាប​ស្ដាំ Kyle Walker។ គួរ​ឲ្យ​ចាប់​អារម្មណ៍​ផង​ដែរ​សម្រាប់​​គ្រាប់​បាល់​នេះ ដោយ​វា​ជា​គ្រាប់​បាល់​ប្រើ​ក្បាល​តែត​លើក​ដំបូង​បំផុត​របស់​កីឡាករ​សញ្ជាតិ​បែលហ្ស៊ិក Kevin De Bruyne គិត​ចាប់​តាំង​ពី​ពេល​គាត់​បាន​ប្រកប​អាជីព​បាល់ទាត់​នៅ Premier League។

គិត​មក​ទល់​នឹង​ពេល​នេះ ខ្សែបម្រើ​ឆ្នើម Kevin De Bruyne ស៊ុត​បញ្ចូលទី​បាន 68 គ្រាប់ ក្នុង​ការ​បង្ហាញ​ខ្លួន 255 ប្រកួត​នៅ Premier League ប៉ុន្តែ​សម្រាប់​គ្រាប់​បាល់​ប្រើ​ក្បាល ទើប​តែ​មាន 1 គ្រាប់​ដែល​គាត់​ធ្វើ​បាន​កាល​ពី​ពេល​ថ្មីៗ​នេះ​ប៉ុណ្ណោះ។ គួរ​ដឹង​ផង​ដែរ​ថា កីឡាករ​ដែល​មាន​ចំនួន​គ្រាប់​បាល់​តែត​បញ្ចូលទី​ច្រើន​ជាង​គេ​នៅ Premier League គឺ​អតីត​វីរបុរស​បាល់ទាត់ Peter Crouch ដែល​តែត​បាន​រហូត​ដល់ 53 គ្រាប់។

ប្រភព: Dailysports