មក​ស្គាល់​កីឡាករ​វ័យ​ក្មេង Claudio Echeverri ដែល​ស៊ុត​បញ្ចូលទី Hat-trick នាំ​អាហ្សង់ទីន​ឡើង​វគ្គ​ពាក់​កណ្ដាល​ផ្ដាច់ព្រ័ត World Cup U-17

កាពីតែន​ក្រុម​ជម្រើស​ជាតិ​អាហ្សង់ទីន U-17 គឺ​កីឡាករ Claudio Echeverri បាន​ស៊ុតបញ្ចូលទី 3 គ្រាប់​ម្នាក់​ឯង ខណៈ​ដែល​អាហ្សង់ទីន​បាន​ឈ្នះ 3-0 លើ​គូ​ប្រជែង​ប្រេស៊ីល ក្នុង​វគ្គ 8 ក្រុម​ចុង​ក្រោយ​នៃ​ព្រឹត្តិការណ៍ FIFA World Cup U-17 កាល​ពី​ម្សិលមិញ ហើយ​ពួក​គេ​នឹង​ត្រូវ​​ជួប​ជាមួយ​​អាឡឺម៉ង់​នៅ​វគ្គ​បន្ទាប់ ជា​វគ្គ​ពាក់កណ្តាល​ផ្តាច់ព្រ័ត្រ។

យ៉ាង​ណា​មិញ អ្នកគាំទ្រ​ជា​ច្រើន​បាន​មើល​ឃើញ​ថា Claudio Echeverri នឹង​ក្លាយ​ជា​អនាគត​នៃ​ខ្សែប្រយុទ្ធ​ដ៏​អស្ចារ្យ​សម្រាប់​អាហ្សង់ទីន រហូត​អ្នក​ខ្លះ​ទៀត​បាន​លាន់មាត់​ថា ទម្រង់​លេង​របស់​កីឡាករ​រូប​នេះ​នឹង​សាកសម​បំផុត​ក្នុង​ការ​ស្នង​តំណែង​មរតក​ដ៏​អស្ចារ្យ​របស់​តារា​ឆ្នើម Lionel Messi។ បច្ចុប្បន្ន Echeverri បាន​ក្លាយ​ជាកីឡាករ​ដែល​ស៊ុតបញ្ចូលទី​ច្រើន​ជាង​គេ​បំផុត​នៃ​ការ​ប្រកួត FIFA World Cup U-17 ដែល​ស្មើ​នឹង​មិត្ត​រួម​ក្រុម​របស់​ខ្លួន Augustin Roberto មាន 5 គ្រាប់​ដូចគ្នា។

តើ Claudio Echeverri ជា​នរណា? កីឡាករ​វ័យ 17 ឆ្នាំ​រូប​នេះ លេង​ក្នុង​តំណែង​ជា​ខ្សែបម្រើ​ប្រយុទ្ធ និង​កំពុង​ប្រកប​អាជីព​ជាមួយ​ក្លឹប River Plate នៃ​លីគ​កំពូល​អាហ្សង់ទីន។ គាត់​ត្រូវបាន​ក្លឹប​ប្រូម៉ូត​ឡើង​មក​លេង​ជា​មួយ​ឈុត​ធំ​នៅ​រដូវកាល​នេះ និង​បាន​បង្ហាញខ្លួន 4 ប្រកួត​មក​ហើយ តែ​មិន​ទាន់​អាច​រក​គ្រាប់​បាល់​បាន​នៅ​ឡើយ​ទេ។

Claudio Echeverri កើត​នៅ​ទីក្រុង Resistencia នៃ​ប្រទេស​អាហ្សង់ទីន ហើយ​បាន​ចាប់ផ្តើម​អាជីព​បាល់ទាត់​ដំបូង​ជាមួយ​ក្រុម Deportivo Lujan។ នៅ​ចុង​ឆ្នាំ 2016 គាត់​បាន​សាកល្បង​សមត្ថភាព​នៅ River Plate ហើយ​នៅ​ឆ្នាំ​បន្ទាប់​ក៏​ចុះហត្ថលេខា​ជា​ផ្លូវការ​​ជាមួយ​ក្លឹប​តែ​ម្ដង។

គាត់​ធ្លាប់​ទទួល​បាន​ការ​ចាប់អារម្មណ៍​ខ្លាំង ដោយ​សារ​តែ​ទម្រង់​លេង​ដ៏អស្ចារ្យ​ជាមួយ​ឈុត​យុវជន​វ័យ​ក្មេង​របស់ River Plate នៅ​ក្នុង​ការ​ប្រកួត​មួយ នា​ទីក្រុង Venice ប្រទេស​អ៊ីតាលី។ ក្រុម​របស់​គាត់​បាន​បញ្ចប់​ក្នុង​ចំណាត់​ថ្នាក់​លេខ 3 ប៉ុន្តែ Claudio Echeverri បាន​ស៊ុត​បញ្ចូល​ទី​រហូត​ដល់ 9 គ្រាប់ ក្នុង​ការ​បង្ហាញ​ខ្លួន​សរុប​ត្រឹមតែ 6 ប្រកួត​ប៉ុណ្ណោះ។

ប្រភព: Thehindu