Lamine Yamal អាច​នឹង​ខកខាន​ការ​ប្រកួត​ក្រោយ ទល់​នឹង​អាល់បានី ដោយ​សារ​អត់​គ្រប់​អាយុ

កីឡាករ​ឆ្នើម Lamine Yamal កំពុង​មាន​រដូវកាល​ដ៏​អស្ចារ្យ​ជាមួយ Barcelona ហើយ​ក៏​កំពុង​រះចែងចាំង​នៅ​ក្នុង​ក្រុម​ជម្រើស​ជាតិ​អេស្ប៉ាញ​ផង​ដែរ​នៅ​ព្រឹត្តិការណ៍ Euro 2024។ ខ្សែ​ប្រយុទ្ធ​ស្លាប​វ័យ​ក្មេង​រូប​នេះ បាន​បង្ហាញ​ខ្លួន​ក្នុង​នាម​ជា​កីឡាករ​ជម្រើស​ដំបូង​របស់​ក្រុម​នៅ 2 ប្រកួត​កន្លង​មក ខណៈ​ដែល​អេស្ប៉ាញ​ក៏​បាន​កក់​កៅអី​ឡើង​ទៅ​កាន់​វគ្គ 16 ក្រុម​ចុង​ក្រោយ​ផង​ដែរ។​

ទោះ​ជា​យ៉ាង​ណា គាត់​អាច​នឹង​ខកខាន​ការ​ប្រកួត​​ក្នុង​ពូល​ទល់​នឹង​អាល់បានី ដោយ​សារ​អាយុ​របស់​គាត់​ខុស​ទៅ​នឹង​ច្បាប់​នៃ​ប្រទេស​អាឡឺម៉ង់។ យ៉ាង​ណា​មិញ យោងតាម​ច្បាប់​របស់​អាឡឺម៉ង់ បាន​ចែង​ថា បុគ្គល​ដែល​មាន​អាយុ​ក្រោម 18 ឆ្នាំ ត្រូវ​បាន​ហាម​ឃាត់​មិន​ឲ្យ​ធ្វើ​ការ​ក្រោយ​ម៉ោង 8:00 យប់​នោះ​ទេ ដើម្បី​ការពារ​ពួក​គេ​នៅ​កន្លែង​ធ្វើ​ការ។ ច្បាប់​នេះ​ក៏​អនុវត្ត​ទាំង​ប្រជា​ពលរដ្ឋ​ក្នុង​ស្រុក និង​ជនបរទេស។

ទោះ​យ៉ាង​ណា​ក៏​ដោយ ច្បាប់​នេះ​មាន​ការ​លើកលែង​សម្រាប់​អត្តពលិក​កីឡា ដែល​ត្រូវ​បាន​អនុញ្ញាត​ឲ្យ​ពួក​គេ​លេង​ដល់​ម៉ោង 11:00 យប់​បាន។ ប៉ុន្តែ​ការ​ប្រកួត​របស់​អេស្ប៉ាញ​ចាប់ផ្តើម​នៅ​ម៉ោង 9:00 PM និង​បញ្ចប់​ត្រឹម​ម៉ោង 11:00 PM ហើយ Lamine Yamal នឹង​ត្រូវ​ការ​ពេល​វេលា​បន្ថែម ដើម្បី​ងូត​ទឹក រឺ​និយាយ​ជាមួយ​អ្នក​សារព័ត៌មាន។ ប្រសិន​បើ​គ្រូ​បង្វឹក​លោក Luis de la Fuente សម្រេច​ចិត្ត​ប្រើប្រាស់​កីឡាករ​រូប​នេះ​នៅ​ក្នុង​ប្រកួត​នោះ អេស្ប៉ាញ​អាច​នឹង​ត្រូវ​ពិន័យ​ជា​ប្រាក់​ចំនួន 30,000 អឺរ៉ូ ទៅ​ឲ្យ​អាជ្ញាធរ​អាឡឺម៉ង់ ព្រោះ Lamine Yamal ចំណាយ​ពេល​នៅ​ទីលាន​លើស​ម៉ោង 11 យប់។

ប្រភព: Dailysports