អតីត​គ្រូ​បង្វឹក​អាហ្សង់ទីន​ម្នាក់​លើក​ឡើង​ថា កីឡាករ​រូប​នេះ​ស្ថិត​នៅ​ក្នុង​កម្រិត​ស្មើ​គ្នា​ជាមួយ Messi និង Maradona ដែរ

អតីត​គ្រូ​បង្វឹក​ដែល​ធ្លាប់​ដឹកនាំ​ក្រុម​ជម្រើស​ជាតិ​អាហ្សង់ទីន Cesar Luis Menotti បាន​អះអាង​ថា គាត់​ចាត់ទុក​ខ្សែប្រយុទ្ធ​ស្លាប Angel di Maria ស្ថិត​នៅ​កម្រិត​ស្មើ​គ្នា​នឹង​វីរបុរស​អាហ្សង់ទីន Diego Maradona, Mario Kempes និង Lionel Messi ដែរ។ យ៉ាង​ណា​មិញ​បុរស​វ័យ 84 ឆ្នាំ​រូប​នេះ​ធ្លាប់​បាន​ដឹកនាំ​កូនក្រុម​របស់​ខ្លួន​ឲ្យ​ឈ្នះពាន World Cup ផង​ដែរ​នៅ​ក្នុង​ឆ្នាំ 1978។

ក្នុង​អំឡុង​ពេល​នោះ វីរបុរស​បាល់ទាត់​អាហ្សង់ទីន Mario Kempes គឺ​ជា​កីឡាករ​ល្អ​ប្រចាំ​ព្រឹត្តិការណ៍​នៃ​ការ​ប្រកួត និង​ជា​អ្នក​ដែល​ស៊ុត​បញ្ចូលទី​បាន​ច្រើន​ជាង​គេ (6 គ្រាប់)។ ដូចគ្នា​នេះ​ដែរ 8 ឆ្នាំ​ក្រោយ​មក​ទៀត Diego Maradona ក៏​បាន​ជួយ​ឲ្យ​អាហ្សង់ទីន​ឈ្នះ​ពាន World Cup ជា​លើក​ទីពីរ នៅ​ក្នុង​ប្រវត្តិសាស្ត្រ​របស់​ខ្លួន។

ចុងក្រោយ Lionel Messi បាន​ជួយ​ឲ្យ​អាហ្សង់ទីន​ឈ្នះពាន World Cup ជា​ថ្មី​ម្ដង​ទៀត​កាល​ពី​ឆ្នាំ​មុន​នៅ​ប្រទេស​កាតា ខណៈ​ដែល​គាត់​ក៏​បាន​ក្លាយ​ជា​កីឡាករ​ល្អ​បំផុត​ប្រចាំ​ព្រឹត្តិការណ៍​នោះ​ដែរ។ ប៉ុន្តែ Menotti ជឿ​ជាក់​ថា Di Maria គួរ​តែ​ទទួល​បាន​ការ​កោតសរសើរ និង​ការគោរព​ដូច​គ្នា​នៅ​ក្នុង​ប្រទេសរបស់​គាត់ ដូចជា Kempes, Maradona និង Messi ដែរ។

Menotti បាន​ប្រាប់ SuperDeportivoRadio ថា៖ “Di Maria គឺ​ជា​កីឡាករ​ដែល​សម​នឹង​ទទួល​បាន​ការ​ទទួល​ស្គាល់​ដូចគ្នា​នឹង​កីឡាករ​បាល់ទាត់​ដ៏​អស្ចារ្យ​ដែរ។ ខ្ញុំ​ដាក់​គាត់​នៅ​កម្រិត​របស់ Kempes, Maradona និង Messi។ គាត់​​ជា​កីឡាករ​ម្នាក់​ដែល​តំណាង​ឲ្យ​បាល់ទាត់​អាហ្សង់ទីន ដែល​ខុស​ពី​កីឡាករ​​ដទៃ​ទៀត…”។

ប្រភព: Dailypost NG