Rafael Benitez ប្រាប់​កីឡាករ​រូប​នេះ កុំ​ឲ្យ​ចាកចេញ​ទៅ Liverpool

គ្រូ​បង្វឹក​លោក Rafael Benitez បាន​ប្រាប់​កីឡាករ Gabri Veiga ដែល​ជា​កូន​ក្រុម​របស់​ខ្លួន​ថា គេ​ជា​កីឡាករ​សំខាន់​ណាស់ និង​គួរ​​បន្ត​ស្នាក់​នៅ Celta Vigo ជំនួស​ឲ្យ​ការ​ចូលរួម​ជាមួយ Liverpool នៅ​រដូវ​ក្តៅនេះ។ យ៉ាង​ណា​មិញ ការ​បង្ហាញ​សមត្ថភាព​របស់ Veiga សម្រាប់ Celta Vigo កាល​ពី​រដូវ​កាល​មុន បាន​នាំ​ឲ្យ​ក្លឹប​កំពូល​ៗ​ជាច្រើន ចាប់​អារម្មណ៍ និង​ចង់​ចុះ​ហត្ថលេខា​លើ​គាត់។

កីឡាករ​សញ្ជាតិ​អេស្ប៉ាញ​វ័យ 22 ឆ្នាំ​រូប​នេះ​បាន​ស៊ុត​បញ្ចូលទី 11 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​ចំនួន 4 ដង ក្នុង​ការ​បង្ហាញ​ខ្លួន​ចំនួន 40 ប្រកួត សម្រាប់ Celta Vigo រដូវកាល 2022/2023។ ជាមួយ​នឹង​ទម្រង់​លេង​ដ៏​ល្អ​នេះ Liverpool គឺ​ជា​ក្លឹប​មួយ​ក្នុង​ចំណោម​ក្លឹប​ដែល​ចាប់អារម្មណ៍ Gabri Veiga ខណៈ​ដែល​ក្លឹប​បិសាចក្រហម Manchester United, Manchester City, Paris Saint-Germain, Real Madrid និង Newcastle United សុទ្ធ​តែ​ចង់​បាន​កីឡាករ​វ័យ 21 ឆ្នាំ​រូប​នេះ​ដូចគ្នា។

ទោះ​ជា​យ៉ាង​ណា​ក្ដី Rafael Benitez ដែល​ជា​គ្រូ​បង្វឹក​របស់​គាត់ ប្រាប់​ថា Gabri Veiga នឹង​ក្លាយ​ជា​បង្អែក​ដ៏​សំខាន់​បំផុត​នៅ​រដូវកាល​ក្រោយ។ Rafael Benitez បាន​ប្រាប់ SPORT ថា “យើង​កំពុង​និយាយ​អំពី​កីឡាករ​សំខាន់​ម្នាក់ ដែល​មក​ពី​ថ្នាល​យុវជន​របស់​ក្លឹប។ ខ្ញុំ​ពិត​ជា​រីករាយ​ដែល​មាន​គាត់​នៅ​ក្នុង​ក្រុម។ វត្តមាន​របស់ Gabri Veiga នឹង​ក្លាយ​ជា​ក្តី​សង្ឃឹម​របស់​អ្នកគាំទ្រ​គ្រប់​គ្នា ហើយ​ខ្ញុំ​នឹង​ព្យាយាម​កែ​លម្អ​ក្រុម​ឲ្យ​បាន​ច្រើន​តាម​ដែល​អាច​ធ្វើ​ទៅ​បាន ប្រសិន​បើ​គាត់​នៅ​ជាមួយ​យើង។ ខ្ញុំ​ចូលចិត្ត​គាត់​ណាស់។ គាត់​​ជា​​កីឡាករ​​ដ៏​អស្ចារ្យ ហើយ​​ខ្ញុំ​ពឹង​លើ​គាត់”។

ប្រភព: Dailypost NG