Chelsea ចង់​ចុះ​ហត្ថលេខា​នាំ​យក​អតីត​ខ្សែ​ប្រយុទ្ធ Willian ត្រឡប់​ទៅ​វិញ ប៉ុន្តែ​ត្រូវ​ខកខាន

ក្លឹប​តោខៀវ Chelsea ត្រូវ​បាន​គេ​ដឹង​ថា បាន​តាមដាន​អំពី​ស្ថានភាព​នៃ​ការ​ចុះ​ហត្ថលេខា​លើ​អតីត​កីឡាករ​របស់​ខ្លួន Willian ត្រឡប់​ទៅ​វិញ។ ពួក​គេ​ចង់​នាំ​យក​តារា​ឆ្នើម​សញ្ជាតិ​ប្រេស៊ីល​រូប​នេះ​លើ​ការ​ផ្ទេរ​ដោយ​គ្មាន​តម្លៃ​ខ្លួន​នៅ​រដូវក្តៅ​នេះ ដើម្បី​ជម្រុញ​ដល់​ទម្រង់​លេង​នៃ​ការ​ដឹកនាំ​ថ្មី​របស់​គ្រូ​បង្វឹក​លោក Mauricio Pochettino។

យ៉ាង​ណា​មិញ Willian បាន​ត្រឡប់​មក​វិញ​ជាមួយ​នឹង​ទម្រង់​លេង​ដ៏​​គួរ​ឲ្យ​ភ្ញាក់​ផ្អើល​នៅ Premier League កាល​ពី​ឆ្នាំ​មុន ពេល​ដែល​គាត់​បាន​ចុះ​កុងត្រា​រយៈ​ពេល​មួយ​ឆ្នាំ​ជាមួយ​ក្លឹប Fulham។ កីឡាករ​ដែល​ជំនាញ​ជើង​ស្ដាំ​រូប​នេះ​ស៊ុត​បញ្ចូល​ទី​បាន 5 គ្រាប់ និង 5 Assists នៅ​ក្នុង​ការ​បង្ហាញ​ខ្លួន​សរុប 27 ប្រកួត​នៅ​ក្នុង​ការ​ប្រកួត​លីគ​កំពូល​របស់​អង់គ្លេស​រដូវកាល 2022/2023។

ទន្ទឹម​នឹង​នេះ​ដែរ យោងតាម ESPN ប្រេស៊ីល​បាន​ចុះ​ផ្សាយ​​ឲ្យ​ដឹង​ថា ក្លឹប​តោខៀវ Chelsea និង​បិសាចក្រហម Manchester United ជា​ក្លឹប​ដែល​បាន​ពិភាក្សា​ជាមួយ​កីឡាករ​រូប​នេះ ពាក់ព័ន្ធ​នឹង​ការ​ចុះហត្ថលេខា​លើ​គាត់​នៅ​មុន​រដូវកាល​ថ្មី 2023/2024។ ទោះ​ជា​យ៉ាង​ណា ការពិភាក្សា​បាន​អូស​បន្លាយ​ពេល​​យូរ​ពេក ទី​បំផុត Willian ក៏​ចុះ​កុងត្រា​ថ្មី​ជាមួយ Fulham ដើម្បី​បន្ត​នៅ Craven Cottage មួយ​ឆ្នាំ​ទៀត។

ប្រភព: Dailypost NG