បាល់ទាត់អន្តរជាតិ
Everton ដាក់តម្លៃខ្លួន Amadou Onana លើសពី 60 លានផោន ក្រោយដឹងថា Man United ចាប់អារម្មណ៍ខ្លាំង
ក្លឹបបិសាចក្រហម Manchester United ត្រូវបានគេរាយការណ៍ថា បានបង្ហាញពីចំណាប់អារម្មណ៍របស់ខ្លួនទៅលើខ្សែបម្រើសញ្ជាតិបែលហ្ស៊ិក Amadou Onana របស់ Everton។ កីឡាករវ័យ 21 ឆ្នាំរូបនេះ បច្ចុប្បន្នគឺជាកីឡាករដ៏សំខាន់សម្រាប់ក្រុមរបស់ខ្លួន និងបានបង្ហាញខ្លួនសរុបកាលពីរដូវកាលមុនរហូតដល់ 35 ប្រកួត។
ក្លឹបបិសាចក្រហម ត្រូវបានគេជឿថា នឹងនៅតែលូកដៃចូលក្នុងទីផ្សារផ្ទេរខ្សែបម្រើកណ្តាលម្នាក់ទៀត ស្របពេលមានកីឡាករចាស់ៗមួយចំនួនបានចាកចេញ។ យោងតាមរបាយការណ៍ចុងក្រោយមួយដែលបានចុះផ្សាយដោយកាសែត Daily Mail បានអះអាងថា Manchester United បានចាប់អារម្មណ៍ខ្លាំងទៅលើខ្សែបម្រើរបស់ក្លឹប Everton រូបនេះបន្ទាប់ពីបរាជ័យក្នុងការផ្ទេរ Romeo Lavia របស់ Southampton។
យ៉ាងណាមិញ Everton បានចាត់ទុក Amadou Onana ជាគ្រាប់ពេជ្រដ៏មានតម្លៃ និងមានតម្លៃខ្លួនខ្ពស់ជាងមិត្តរួមជាតិបែលហ្ស៊ិករបស់គាត់ Romeo Lavia ទៅទៀត។ សម្រាប់ Romeo Lavia កំពុងត្រៀមបញ្ចប់ការផ្ទេរទៅ Chelsea ក្នុងតម្លៃប្រហែល 50 ទៅ 60 លានផោន ដូច្នេះ Everton ចង់បានតម្លៃខ្លួន Amadou Onana លើសពីនេះបន្តិច អាចនឹង 65 ទៅ 70 លានផោន។
ប្រភព: Sportsmole