U-19 ឡាវ បំបែក​កំណត់​ត្រា​ឡើង​វគ្គ​ផ្ដាច់​ព្រ័ត AFF U-19 Youth Championship និង​អាច​ជា​ក្រុម​លើក​ពាន​នៅ​ឆ្នាំ​នេះ!!!

វា​ជា​រឿង​ដ៏​អស្ចារ្យ និង​បង្ហាញ​ពី​ការ​អភិវឌ្ឍ​វិស័យ​បាល់ទាត់​នៅ​ក្នុង​ប្រទេស​ឡាវ ដោយ​ក្រុម​ជម្រើស​ជាតិ​ឈុត​យុវជន U-19 របស់​ពួក​គេ​បាន​បំបែក​កំណត់​ត្រា​ឡើង​មក​លេង​វគ្គ​ផ្ដាច់ព្រ័ត AFF U-19 Boys Championship នេះ​ជា​លើក​ដំបូង​ក្នុង​ប្រវត្តិសាស្ត្រ។

ក្រុម​ជម្រើស​ជាតិ​ឡាវ បាន​បំបាក់​ក្រុម​ទាំងអស់​នៅ​ក្នុង​ពូល B ដែល​មាន កម្ពុជា, សិង្ហបុរី, ម៉ាឡេស៊ី និង​ទីម័រ។ ពួក​គេ​នៅ​តែ​បន្ត​ភាព​ខ្លាំង​របស់​ខ្លួន ដោយ​បាន​ជួប​ជា​មួយ​នឹង​ក្រុម​ជម្រើស​ជាតិ​ថៃ​នៅ​​វគ្គ​ពាក់កណ្ដាល​ផ្ដាច់ព្រ័ត្រ ហើយ​បន្ត​ជ័យ​ជំនះ​ឈ្នះ​ក្រុម​ខ្លាំង​ថៃ​ដែល​ជា​ម្ចាស់​ពាន 5 សម័យកាល ក្នុង​លទ្ធផល 2 ទល់នឹង 0។

ឡាវ​មិន​ធ្លាប់​ឡើង​ដល់​វគ្គ​ផ្ដាច់ព្រ័ត្រ​នៃ​ការ​ប្រកួត​បែប​នេះ​ទេ ចាប់​តាំង​ពី​ចាប់​ផ្ដើម​បង្កើត​ពាន​នេះ ក្នុង​ឆ្នាំ​ 2002 ដោយ​ពួក​គេ​ធ្លាប់​បាន​ទទួល​ចំណាត់​ថ្នាក់​ល្អ​បំផុត ត្រឹម​តែ​លេខ 3 ប៉ុណ្ណោះ។

U-19 របស់​ក្រុម​ជម្រើស​ជាតិ​ឡាវ ត្រូវ​បាន​គេ​គិត​ថា គឺ​ជា​ក្រុម​ដែល​អាច​នឹង​បង្កើត​ប្រវត្តិសាស្ត្រ​ដ៏​អស្ចារ្យ​របស់​ខ្លួន​នៅ​ឆ្នាំ​នេះ ជា​មួយ​នឹង​ការ​លើក​ពាន AFF U-19 នេះ​ជា​លើក​ដំបូង ខណៈ​ដែល​ពួក​គេ​ត្រូវ​ប្រកួត​វគ្គ​ផ្ដាច់​ព្រ័ត​ជា​មួយ​នឹង​ក្រុម​ជម្រើស​ម៉ាឡេស៊ី ដែល​ក្រុម​ទាំង​ពីរ​នេះ ក៏​ធ្លាប់​បាន​ជួប​គ្នា​ម្ដង​រួច​មក​ហើយ នៅ​ក្នុង​ការ​ប្រកួត​ជម្រុះ​ក្នុង​ពូល ហើយ​ឡាវ​បាន​យក​ឈ្នះ​ម៉ាឡេស៊ី​ក្នុង​លទ្ធផល 1 ទល់នឹង 0។

ប្រសិន​បើ​ពួក​គេ​អាច​លើក​ពាន​នៅ​ឆ្នាំ​នេះ​មែន មិន​ត្រឹមតែ​បង្កើត​កំណត់​ត្រា​​ដ៏​អស្ចារ្យ​សម្រាប់​ប្រទេស​របស់​ខ្លួន​ប៉ុណ្ណោះ​ទេ ប៉ុន្តែ​គេ​ក៏​ជា​ក្រុម​ដែល​បំបែក​កំណត់​ត្រា មិន​ចាញ់ និង​មិន​​ស្មើ សូម្បី​តែ​មួយ​ប្រកួត ពោល​គឺ​ក្រុម​ឡាវ​ឈ្នះ​គ្រប់​ប្រកួត​ទាំងអស់​តាំង​ពី​ក្នុង​ពូល រហូត​មក​ដល់​វគ្គ​ផ្ដាច់​ព្រ័ត​នេះ។ យ៉ាង​ណា​មិញ​ការ​ប្រកួត​វគ្គ​ផ្ដាច់ព្រ័ត នឹង​ធ្វើ​ឡើង​នៅ​ថ្ងៃ​ស្អែក​នេះ វេលា​ម៉ោង 8 យប់។ រង​ចាំ​មើល​ថា ក្រុម​ជម្រើស​ឡាវ​អាច​លើក​ពាន​នេះ​ជា​លើក​ដំបូង​ក្នុង​ប្រវត្តិសាស្ត្រ​របស់​ខ្លួន​បាន​ដែរ រឺ​យ៉ាងណា?

ប្រភព: Aseanfootball